ترکیہ کی اسٹیل فیکٹری میں خوفناک دھماکا، 16 افراد جاں بحق، 14 زخمی

انقرہ: ترکیہ کے مغربی علاقے میں اسٹیل اور لوہا تیار کرنے والی فیکٹری میں خوفناک دھماکے کے نتیجے میں 16 افراد جاں بحق جبکہ 14 زخمی ہوگئے، زخمیوں میں سے تین کی حالت تشویشناک بتائی جا رہی ہے۔

ترک صدر رجب طیب اردوان نے کابینہ اجلاس کے بعد واقعے میں ہلاکتوں کی تصدیق کرتے ہوئے متاثرہ خاندانوں سے تعزیت کا اظہار کیا۔

گورنر آفس کے مطابق دھماکا ترکیہ کے ساحلی صوبے ازمیر کے ضلع علی آغا میں واقع ایک آئرن اینڈ اسٹیل فیکٹری میں پیش آیا۔

ابتدائی تحقیقات کے مطابق مائع اسٹیل کی تیاری کے دوران فیکٹری کی چھت پر نصب کرین اچانک ٹوٹ کر آرک فرنس میں جا گری، جس کے باعث زور دار دھماکا ہوا۔

دھماکے کی شدت اس قدر زیادہ تھی کہ فیکٹری کے اوپر دھوئیں اور گردوغبار کے گہرے بادل چھا گئے۔ واقعے کے فوری بعد امدادی کارروائیاں شروع کردی گئیں اور زخمیوں کو اسپتال منتقل کیا گیا۔

حکام کے مطابق حادثے میں زخمی ہونے والے 14 افراد میں سے تین کی حالت تشویشناک ہے جبکہ واقعے کی وجوہات جاننے کے لیے تحقیقات جاری ہیں۔