سفارت خانہ پاکستان واشنگٹن میں علامہ اقبال کے 150ویں یومِ ولادت پر خصوصی تقریب، سفیر رضوان سعید شیخ کا خراجِ عقیدت

واشنگٹن ڈی سی: علامہ محمد اقبال کے 150ویں یومِ ولادت کے موقع پر سفارت خانہ پاکستان واشنگٹن ڈی سی میں خصوصی تقریب کا انعقاد کیا گیا، جس میں سفیر پاکستان رضوان سعید شیخ، پاکستانی کمیونٹی رہنماؤں، شعراء، میڈیا نمائندگان اور مختلف شعبہ ہائے زندگی سے تعلق رکھنے والے افراد نے شرکت کی۔

تقریب سے خطاب کرتے ہوئے سفیر رضوان سعید شیخ نے کہا کہ علامہ اقبال کی بصیرت افروز شاعری نے پاکستان کی قومی تاریخ اور شناخت پر گہرے نقوش چھوڑے ہیں۔ ان کے افکار نے برصغیر کے مسلمانوں میں خودی، خودمختاری اور سیاسی خودارادیت کا شعور بیدار کیا اور تحریکِ پاکستان کی فکری بنیاد فراہم کی۔

انہوں نے کہا کہ اقبال کا تصورِ خودی نوجوانوں کو خود اعتمادی، بامقصد جدوجہد اور روحانی آزادی کا درس دیتا ہے، جبکہ شاہین کا تصور بلند حوصلے، جرأت اور حصولِ کمال کی ترغیب دیتا ہے۔ ضرورت اس امر کی ہے کہ فکرِ اقبال کو نئی نسل تک منتقل کیا جائے۔

تقریب میں ’’اقبال کی شاعری اور عصرِ حاضر کے تقاضے‘‘ کے موضوع پر پینل ڈسکشن بھی منعقد ہوئی۔ اس موقع پر شعراء نے اپنا کلام پیش کیا، جبکہ صادقین گیلری شکاگو کی جانب سے کلامِ اقبال پر مبنی فن پاروں کی تصویری نمائش اور خصوصی ویڈیو بھی پیش کی گئی۔

مقررین نے علامہ اقبال کے 1930 کے خطبۂ الہ آباد اور مسلمانوں کے لیے الگ وطن کے تصور پر روشنی ڈالتے ہوئے کہا کہ اقبال کا فکری و ادبی ورثہ آج بھی قومی رہنمائی کا اہم ذریعہ ہے۔

سفیر رضوان سعید شیخ نے اس عزم کا اظہار کیا کہ پاکستان کو خوشحال، پُرامن اور متحد ملک بنانے کے لیے فکرِ اقبال سے رہنمائی حاصل کرنے کا سلسلہ جاری رکھا جائے گا۔

تقریب کا اہتمام بزمِ حرف و سخن اور انٹرنیشنل اکیڈمی آف لیٹرز کے اشتراک سے کیا گیا، جبکہ فرسٹ سیکرٹری افراح طارق نے نظامت کے فرائض انجام دیے۔