امریکا کا ایران کے مطالبات ماننے سے انکار، مارکو روبیو

واشنگٹن: امریکا نے ایران کے بعض مطالبات قبول کرنے سے انکار کرتے ہوئے انہیں ناقابلِ قبول، غیر معقول اور حقائق سے دور قرار دے دیا ہے۔

امریکی وزیر خارجہ مارکو روبیو نے اپنے بیان میں کہا ہے کہ صدر ڈونلڈ ٹرمپ ہر مسئلے کا سفارتی حل چاہتے ہیں اور اگر ایران کے ساتھ مذاکرات کے ذریعے کسی قابلِ قبول نتیجے تک پہنچنے کا امکان ہوا تو امریکا سفارت کاری کا راستہ ضرور اختیار کرے گا۔

مارکو روبیو کا کہنا تھا کہ ایران کے بعض مطالبات ایسے ہیں جنہیں قبول کرنا ممکن نہیں، کیونکہ وہ غیر معقول اور زمینی حقائق سے مطابقت نہیں رکھتے۔

امریکی وزیر خارجہ نے مزید کہا کہ ایران کو تباہ کن ہتھیار حاصل کرنے کی اجازت نہیں دی جا سکتی۔ امریکا اس معاملے کو اپنی قومی اور بین الاقوامی سلامتی کے تناظر میں انتہائی اہمیت دیتا ہے۔

انہوں نے صدر ڈونلڈ ٹرمپ کی ایران کے خلاف کارروائیوں کا دفاع کرتے ہوئے کہا کہ یہ اقدامات کسی سیاسی فائدے کے حصول کے لیے نہیں کیے گئے۔

مارکو روبیو کے بیان سے واضح ہوتا ہے کہ امریکا ایک جانب ایران کے معاملے پر سفارتی حل کا امکان برقرار رکھنا چاہتا ہے، تاہم دوسری جانب ایران کے بعض مطالبات پر اپنے مؤقف میں لچک دکھانے کے لیے تیار نہیں۔

ایران اور امریکا کے درمیان کشیدگی کے تناظر میں امریکی وزیر خارجہ کا یہ بیان اہمیت کا حامل ہے، جبکہ دونوں ممالک کے درمیان ممکنہ سفارتی پیش رفت کا انحصار باہمی مطالبات اور اختلافات پر اتفاقِ رائے پیدا کرنے پر ہوگا۔