امریکی عوام طویل جنگوں سے تنگ آ چکے ہیں، اسرائیل امریکا کو جنگوں میں دھکیل رہا ہے: عباس عراقچی

ایران کے وزیر خارجہ عباس عراقچی نے کہا ہے کہ امریکی عوام اسرائیل کی جانب سے امریکا کو طویل اور نہ ختم ہونے والی جنگوں میں دھکیلنے سے تنگ آ چکے ہیں اور مزید جنگیں نہیں چاہتے۔

عباس عراقچی نے امریکی نشریاتی ادارے سی بی ایس پر صدر ڈونلڈ ٹرمپ کے انٹرویو پر ردِعمل دیتے ہوئے کہا کہ امریکی صدر بھی جانتے ہیں کہ ایران کے ساتھ جنگ امریکی عوام میں غیر مقبول ہے۔

ایرانی وزیر خارجہ کے مطابق مشرقِ وسطیٰ کے عوام بھی مسلسل جنگوں اور تنازعات سے تھک چکے ہیں۔ انہوں نے کہا کہ امریکی ووٹرز اپنا فیصلہ سنا چکے ہیں، اب وائٹ ہاؤس کو اپنی پالیسی کا انتخاب کرنا ہے۔

عباس عراقچی نے مزید کہا کہ ایران کی جانب سے پیش کی گئی دو روزہ تجویز اب بھی برقرار ہے۔ امریکا تمام محاذوں پر جنگ کے خاتمے سمیت ایرانی شرائط پوری کرے تو مثبت پیش رفت ممکن ہے، بصورتِ دیگر ایران کی جانب سے بھرپور جواب دیا جائے گا۔

مجوزہ منصوبے کے مطابق پہلے مرحلے میں امریکا معاہدے پر عمل درآمد کے لیے عملی اقدامات کرے گا، جبکہ اگلے روز آبنائے ہرمز کو بحری ٹریفک کے لیے کھولنے اور جہازوں کی آمدورفت معمول پر لانے کی تجویز شامل ہے۔