پاکستان کا یوکرین تنازع کے حل کے لیے جنگ بندی، مذاکرات اور سفارتکاری پر زور

نیویارک: پاکستان نے یوکرین تنازع کے فوری اور پائیدار حل کے لیے جنگ بندی، مذاکرات اور سفارتکاری کو ناگزیر قرار دیتے ہوئے تمام فریقین پر زور دیا ہے کہ وہ مزید کشیدگی سے گریز کریں اور بین الاقوامی قوانین کی پاسداری یقینی بنائیں۔

اقوام متحدہ کی سلامتی کونسل سے خطاب کرتے ہوئے پاکستان کے مستقل مندوب سید حیدر شاہ نے کہا کہ یوکرین جنگ میں شدت اور شہری ہلاکتوں میں اضافے پر پاکستان کو گہری تشویش ہے۔

انہوں نے کہا کہ توانائی کی تنصیبات، ذرائع نقل و حمل اور تجارتی جہازوں کو نشانہ بنانے والے حملے نہایت تشویشناک ہیں، کیونکہ ان کے اثرات صرف جنگ سے متاثرہ علاقوں تک محدود نہیں رہتے بلکہ وسیع تر علاقائی اور عالمی سلامتی کو بھی متاثر کرتے ہیں۔

سید حیدر شاہ کا کہنا تھا کہ تنازع کے تمام فریقین کو مزید کشیدگی سے گریز کرنا چاہیے اور بین الاقوامی قانون کے اصولوں کی پاسداری کرنی چاہیے۔

پاکستانی مندوب نے واضح کیا کہ یوکرین تنازع کا پُرامن حل ہی واحد قابل عمل اور ذمہ دارانہ راستہ ہے۔ اس مقصد کے لیے جنگ بندی، بامعنی مذاکرات اور مؤثر سفارتی کوششوں کو ترجیح دینا ضروری ہے۔

انہوں نے مزید کہا کہ پاکستان یوکرین تنازع کے پائیدار اور پُرامن حل کے لیے سفارتی کوششوں کی حمایت جاری رکھے گا۔