تربیلا ڈیم کے توسیعی منصوبے کی کنکٹنگ ٹنل میں حادثہ، چٹان کا حصہ گرنے سے پانی پاور ہاؤس میں داخل

ہری پور: تربیلا ڈیم کے توسیعی پن بجلی منصوبے ٹی فائیو (T5) کی کنکٹنگ ٹنل میں کھدائی کے دوران چٹان کا ایک کمزور حصہ گرنے سے حادثہ پیش آگیا، جس کے نتیجے میں ان ٹیک پٹ سے پانی ٹنل اور زیر تعمیر پاور ہاؤس میں داخل ہوگیا۔ واقعے کے بعد منصوبے پر جاری تعمیراتی کام روک دیا گیا۔

ڈپٹی کمشنر ہری پور کے مطابق ٹی فائیو منصوبے کے بند کا ایک حصہ ٹوٹنے کے باعث ٹنل نمبر پانچ میں پانی داخل ہونا شروع ہوگیا۔ حادثے کے وقت منصوبے پر کام کرنے والے تمام پاکستانی اور غیر ملکی ورکرز کو بحفاظت نکال لیا گیا، جبکہ کسی جانی نقصان کی اطلاع نہیں ملی۔

دوسری جانب واپڈا کے ترجمان نے تربیلا ڈیم کی ٹنل نمبر پانچ مکمل طور پر منہدم ہونے کی اطلاعات کو غلط قرار دیا ہے۔ ترجمان کے مطابق ان ٹیک پٹ سے پانی مکمل طور پر نکال لیا گیا ہے، جبکہ زیر تعمیر پاور ہاؤس سے پانی نکالنے کا عمل جاری ہے۔

واپڈا ترجمان کا کہنا ہے کہ حادثے کے باوجود منصوبے کی مین ٹنل، زیر تعمیر پاور ہاؤس، ٹیل ریس کلورٹ اور سوئچ یارڈ کو کوئی نقصان نہیں پہنچا۔ واپڈا کے سینئر افسران، کنسلٹنٹس اور کنٹریکٹرز صورت حال کا جائزہ لے رہے ہیں تاکہ حادثے کی وجوہات اور نقصانات کا تعین کیا جاسکے۔

ادھر دریائے سندھ میں پانی کے بہاؤ میں اضافے کے خدشے کے پیش نظر ضلعی انتظامیہ ہری پور نے الرٹ جاری کردیا ہے۔

ڈپٹی کمشنر ہری پور کے مطابق آئندہ دو سے تین روز کے دوران دریائے سندھ میں پانی کا بہاؤ بڑھنے کا امکان ہے۔ انتظامیہ نے دریا کے کنارے آباد شہریوں کو احتیاطی تدابیر اختیار کرنے اور اپنے مال مویشی فوری طور پر محفوظ مقامات پر منتقل کرنے کی ہدایت کی ہے۔