ارجنٹینا کا شاندار کم بیک، مصر کو 3-2 سے شکست دے کر کوارٹر فائنل میں جگہ بنا لی

(اٹلانٹا) فیفا ورلڈ کپ کے ناک آؤٹ مرحلے میں دفاعی چیمپئن ارجنٹینا نے شاندار کم بیک کا مظاہرہ کرتے ہوئے مصر کو 3-2 سے شکست دے کر کوارٹر فائنل کے لیے کوالیفائی کر لیا، جبکہ پہلی بار ناک آؤٹ مرحلے تک رسائی حاصل کرنے والی مصری ٹیم کا سفر اختتام پذیر ہوگیا۔

امریکا کے شہر اٹلانٹا میں کھیلے گئے دلچسپ مقابلے میں محمد صلاح کی قیادت میں مصر نے ابتدا ہی سے جارحانہ انداز اپنایا اور ارجنٹینا کے دفاع کو مسلسل دباؤ میں رکھا۔ میچ کے 15ویں منٹ میں یاسر ابراہیم نے گول کر کے مصر کو برتری دلائی۔

ارجنٹینا کو 21ویں منٹ میں پنالٹی کے ذریعے اسکور برابر کرنے کا موقع ملا، تاہم لیونل میسی کی طاقتور کک کو مصری گول کیپر نے شاندار انداز میں روک کر اپنی ٹیم کی سبقت برقرار رکھی۔

دوسرے ہاف میں مصر نے اپنی برتری مزید مستحکم کرتے ہوئے 67ویں منٹ میں مصطفیٰ زیکو کے گول کی بدولت اسکور 2-0 کر دیا، جس کے بعد ایسا محسوس ہونے لگا کہ مصر ایک بڑا اپ سیٹ کرنے میں کامیاب ہو جائے گا۔

تاہم دفاعی چیمپئن ارجنٹینا نے آخری لمحات میں شاندار واپسی کی۔ 79ویں منٹ میں کرسٹیان رومیرو نے گول کر کے خسارہ کم کیا، جبکہ 83ویں منٹ میں لیونل میسی نے گول کر کے مقابلہ 2-2 سے برابر کر دیا۔

میچ کے انجری ٹائم میں اینزو فرنینڈس نے فیصلہ کن گول اسکور کر کے ارجنٹینا کو 3-2 کی یادگار فتح دلا دی۔

اس کامیابی کے ساتھ ارجنٹینا نے کوارٹر فائنل میں جگہ بنا لی، جہاں اس کا مقابلہ سوئٹزرلینڈ اور کولمبیا کے درمیان ہونے والے میچ کی فاتح ٹیم سے ہوگا، جبکہ مصر کی تاریخی مہم ناک آؤٹ مرحلے میں اختتام پذیر ہوگئی۔