پنجگور میں دہشت گردی کی بڑی سازش ناکام، سکیورٹی فورسز نے بھاری اسلحہ اور دھماکہ خیز مواد برآمد کر لیا

(پنجگور )بلوچستان کے ضلع پنجگور میں سکیورٹی فورسز نے بروقت اور مؤثر کارروائی کرتے ہوئے دہشت گردی کی ایک بڑی سازش ناکام بنا دی اور بھاری مقدار میں اسلحہ، دھماکہ خیز مواد اور مواصلاتی سامان برآمد کر لیا۔

سکیورٹی ذرائع کے مطابق پنجگور کے علاقے جیرک میں خفیہ اطلاعات کی بنیاد پر ایک خصوصی آپریشن کیا گیا، جس کے دوران دہشت گردوں کے زیر استعمال ایک گاڑی سے بڑی مقدار میں خطرناک مواد قبضے میں لیا گیا۔

ذرائع کے مطابق برآمد ہونے والے سامان میں 4 راکٹ فیوز، متعدد دیسی ساختہ بم (آئی ای ڈیز) اور مواصلاتی آلات شامل ہیں۔ ابتدائی تحقیقات کے مطابق یہ دھماکہ خیز مواد کسی بڑے دہشت گرد حملے میں استعمال کیے جانے کا امکان تھا۔

سکیورٹی حکام کا کہنا ہے کہ فورسز کی بروقت اور پیشہ ورانہ کارروائی کے باعث دہشت گردوں کا منصوبہ ناکام بنا دیا گیا اور علاقے کو ممکنہ بڑے جانی و مالی نقصان سے بچا لیا گیا۔

ذرائع کے مطابق آپریشن کے بعد علاقے میں مزید سرچ اور کلیئرنس سرگرمیاں بھی جاری ہیں تاکہ کسی بھی ممکنہ خطرے کا مکمل خاتمہ یقینی بنایا جا سکے۔

سکیورٹی فورسز نے اس عزم کا اعادہ کیا ہے کہ بلوچستان سمیت ملک بھر میں امن دشمن عناصر کے خلاف کارروائیاں بلا تعطل جاری رہیں گی اور دہشت گردی کے ہر منصوبے کو ناکام بنایا جائے گا۔

تجزیہ کاروں کے مطابق پنجگور میں یہ کامیاب کارروائی سکیورٹی اداروں کی مؤثر انٹیلی جنس صلاحیتوں اور دہشت گردی کے خلاف جاری آپریشنز کی اہمیت کو اجاگر کرتی ہے۔ سکیورٹی فورسز کی مسلسل کارروائیاں ملک میں امن و استحکام کے قیام کے لیے کلیدی کردار ادا کر رہی ہیں۔