پنو کا دعویٰ: 2047 تک بھارت نو ٹکڑوں میں بٹ جائے گا

نیو یارک - خالصتان تحریک کے رہنما اور سکھ فار جسٹس کے جنرل کونسل گرپتونت سنگھ پنو نے نیویارک میں یو این جنرل اسمبلی 2026 کی کوریج کے لیے موجود پاکستانی اور دیگر صحافیوں کے ایک گروپ سے گفتگو کرتے ہوئے دعویٰ کیا ہے کہ بھارت 2047 تک نو ٹکڑوں میں تقسیم ہوجائے گا۔

پنو کا کہنا تھا کہ سکھ ریفرنڈم اور بیلٹ کے ذریعے خالصتان تحریک آگے بڑھا رہے ہیں اور کامیابی کے بعد اقوام متحدہ میں بھارتی پنجاب کو مقبوضہ علاقہ قرار دینے کے لیے پٹیشن دائر کی جائے گی۔

انہوں نے بھارت پر پاکستان میں دہشت گردی کی حمایت اور بیرونِ ملک سکھ کارکنوں کو نشانہ بنانے کے الزامات بھی عائد کیے۔ پنو نے کہا کہ کینیڈا اور امریکا میں ان کے خلاف مبینہ سازشیں سامنے آچکی ہیں۔ امریکی حکام کے مطابق 2023 میں پنو کے قتل کی سازش کے مقدمے میں بھارتی شہری نکھل گپتا نے امریکی عدالت میں جرم قبول کیا تھا۔

پنو نے مزید کہا کہ سکھ برادری خالصتان کے قیام کے لیے اپنی جدوجہد جاری رکھے گی اور انہیں پاکستان میں عوامی حمایت حاصل ہے۔