ٹرمپ اور شی جن پنگ کی 24 ستمبر کو واشنگٹن میں اہم ملاقات، تجارت سمیت کئی معاملات ایجنڈے پر

واشنگٹن: امریکی صدر ڈونلڈ ٹرمپ اور چینی صدر شی جن پنگ کے درمیان 24 ستمبر کو وائٹ ہاؤس میں اہم ملاقات طے ہے۔ چینی صدر 23 سے 25 ستمبر تک امریکا کے سرکاری دورے پر ہوں گے۔

ملاقات میں امریکا اور چین کے درمیان تجارتی تعلقات، موجودہ تجارتی جنگ بندی میں توسیع، تائیوان، مصنوعی ذہانت، سپلائی چینز اور ایران سمیت علاقائی امور پر بات چیت متوقع ہے۔

رائٹرز کے مطابق تجزیہ کاروں کو اس ملاقات سے کسی بڑے بریک تھرو کے بجائے دونوں ممالک کے درمیان موجودہ تجارتی کشیدگی کو قابو میں رکھنے اور تعلقات میں استحکام کی توقع ہے۔ دونوں فریق گزشتہ سال طے پانے والی تجارتی جنگ بندی کو برقرار رکھنے کے امکانات پر بھی غور کرسکتے ہیں۔

رپورٹ کے مطابق حالیہ مہینوں میں چین کی عالمی تجارت میں اضافہ ہوا ہے، جبکہ امریکی صدر ٹرمپ کو ایران کے ساتھ جاری جنگ اور مہنگائی سمیت مختلف داخلی مسائل کا سامنا ہے۔ رائٹرز نے اپنی حالیہ رپورٹ میں ٹرمپ کی عوامی مقبولیت میں کمی کا بھی ذکر کیا ہے۔

دونوں رہنماؤں کی ملاقات ایسے وقت میں ہورہی ہے جب امریکا اور چین تجارت، ٹیکنالوجی، تائیوان اور ایران سمیت متعدد معاملات پر اختلافات کے باوجود اعلیٰ سطحی رابطے برقرار رکھنے کی کوشش کر رہے ہیں۔