محسن نقوی کی ایرانی صدر سے ملاقات، پاک ایران تعاون مزید بڑھانے پر اتفاق

وفاقی وزیر داخلہ محسن نقوی نے ایران کے سرکاری دورے کے دوران ایرانی صدر مسعود پزشکیان سے ملاقات کی، جس میں پاک ایران تعلقات، علاقائی صورتحال اور باہمی تعاون کے مختلف امور پر تبادلہ خیال کیا گیا۔

ایرانی صدر مسعود پزشکیان نے کہا کہ امریکی دباؤ کے باعث مسلم ممالک ایک دوسرے کے مزید قریب آئے ہیں۔ ایران اور پاکستان اپنی علاقائی صلاحیتوں سے فائدہ اٹھاتے ہوئے باہمی ضروریات کا کچھ حصہ پورا کرسکتے ہیں۔

ملاقات میں پاکستان اور ایران کے درمیان تجارت، معیشت، سیاست، ثقافت اور سائنس سمیت مختلف شعبوں میں تعاون مزید وسعت دینے کے عزم کا اظہار کیا گیا۔

دوسری جانب محسن نقوی نے ایرانی وزارت داخلہ کا بھی دورہ کیا جہاں ایرانی وزیر داخلہ سکندر مومنی سے ملاقات ہوئی۔ ملاقات میں پاک ایران دوطرفہ تعلقات، خطے کی تازہ صورتحال اور مختلف شعبوں میں جاری تعاون پر پیش رفت کا جائزہ لیا گیا۔

سکندر مومنی نے علاقائی امن و استحکام کے لیے وزیراعظم شہباز شریف اور فیلڈ مارشل کی کوششوں کو سراہتے ہوئے کہا کہ خطے میں امن کے لیے پاکستان کی مسلسل کاوشیں قابلِ قدر ہیں۔ انہوں نے پاکستان کے حالیہ دورے کو بھی مفید قرار دیا۔

محسن نقوی نے اس عزم کا اظہار کیا کہ آنے والے وقت میں پاکستان اور ایران کے دوطرفہ تعلقات مزید مستحکم ہوں گے۔