وزیراعظم کا حافظ نعیم سے رابطہ، مارچ ملتوی کرنے کی درخواست، جماعت اسلامی کا انکار

وزیراعظم شہباز شریف نے امیر جماعت اسلامی حافظ نعیم الرحمان سے ٹیلیفونک رابطہ کیا اور جماعت اسلامی سے پٹرولیم لیوی کے خلاف مارچ چند دن کے لیے ملتوی کرنے کی درخواست کی۔

وزیراعظم نے کہا کہ حکومت جماعت اسلامی سے پٹرولیم لیوی کے معاملے پر نتیجہ خیز مذاکرات کے لیے تیار ہے۔ انہوں نے یقین دہانی کرائی کہ وطن واپس پہنچتے ہی حافظ نعیم الرحمان سے ملاقات کریں گے اور عوام کے لیے بہتر ریلیف پیکج کا اعلان کرنے کی کوشش کی جائے گی۔

دوسری جانب حافظ نعیم الرحمان نے احتجاج ختم کرنے سے انکار کرتے ہوئے کہا کہ جماعت اسلامی اپنی جدوجہد جاری رکھے گی اور پٹرولیم لیوی کے خاتمے تک احتجاج سے دستبردار نہیں ہوگی۔ ان کا کہنا تھا کہ جماعت اسلامی گزشتہ ڈیڑھ ماہ سے لیوی کے خلاف احتجاج کر رہی ہے، تاہم لانگ مارچ میں چند دن کے وقفے سے متعلق جماعت سے مشاورت کی جائے گی۔

دریں اثنا پٹرولیم لیوی کے خلاف جماعت اسلامی کا ٹرین مارچ ملتان پہنچ گیا۔ ملتان میں جلسے سے خطاب کرتے ہوئے حافظ نعیم الرحمان نے پٹرول پر عائد لیوی کو عوام پر اضافی بوجھ قرار دیتے ہوئے کہا کہ عوام کو اس ’’بھتہ ٹیکس‘‘ سے نجات دلائی جائے گی۔ انہوں نے واضح کیا کہ پٹرول پر لیوی کسی صورت قبول نہیں۔