عطا تارڑ کا پیپلزپارٹی کو پیغام: ن لیگ کو آزاد کشمیر میں سادہ اکثریت مل گئی، نتائج قبول کریں

اسلام آباد: وفاقی وزیر اطلاعات عطا تارڑ نے کہا ہے کہ مسلم لیگ (ن) آزاد کشمیر کے انتخابات میں سادہ اکثریت حاصل کر چکی ہے اور پاکستان پیپلزپارٹی کو چاہیے کہ وہ انتخابی نتائج تسلیم کرتے ہوئے مسلم لیگ (ن) کو مبارکباد دے اور آگے بڑھے۔

میڈیا سے گفتگو کرتے ہوئے عطا تارڑ نے کہا کہ آزاد کشمیر میں انتخابات کے دوسرے مرحلے میں بھی مسلم لیگ (ن) نے کامیابی حاصل کی، تاہم پارٹی کی اکثریت مخالفین کو ہضم نہیں ہو رہی۔ انہوں نے کہا کہ عوام نے انتخابی مہم میں بھرپور حصہ لیا اور تعمیر و ترقی کے حق میں فیصلہ دیا۔

انہوں نے کہا کہ وزیراعظم شہباز شریف نے گلگت بلتستان کے انتخابات میں کامیابی پر سب سے پہلے پاکستان پیپلزپارٹی کو مبارکباد دی تھی، لیکن آج پیپلزپارٹی کی جانب سے بے بنیاد الزامات عائد کیے جا رہے ہیں۔ ان کے مطابق اگر کسی کے پاس دھاندلی کے الزامات ہیں تو انہیں شواہد اور ثبوت بھی پیش کرنے چاہییں۔

عطا تارڑ کا کہنا تھا کہ گلگت بلتستان میں بلاول بھٹو زرداری نے بھرپور انتخابی مہم چلائی، جس کا انہیں فائدہ ہوا، جبکہ آزاد کشمیر میں مسلم لیگ (ن) اور نواز شریف کی مؤثر انتخابی مہم کے باعث عوام نے پارٹی پر اعتماد کا اظہار کیا۔ انہوں نے کہا کہ صرف الزام تراشی سے گریز کیا جانا چاہیے۔

وفاقی وزیر اطلاعات نے کہا کہ جمہوری نظام میں سیاسی اختلافات اور نوک جھونک معمول کی بات ہے، تاہم انتخابی نتائج کو تسلیم کرنا بھی جمہوری روایت کا حصہ ہے۔ ان کا کہنا تھا کہ پیپلزپارٹی کو چاہیے کہ وہ آزاد کشمیر میں مسلم لیگ (ن) کی کامیابی پر مبارکباد دے۔

عطا تارڑ نے مزید کہا کہ مسلم لیگ (ن) اور نواز شریف نے ہمیشہ آزاد کشمیر کی ترقی کو اپنی ترجیحات میں رکھا ہے، جبکہ وزیراعظم شہباز شریف وہاں دانش اسکولوں کے قیام سمیت مختلف ترقیاتی منصوبوں پر کام کر رہے ہیں۔ انہوں نے دعویٰ کیا کہ عوام نے خدمت، ترقی اور بہتر کارکردگی کی بنیاد پر مسلم لیگ (ن) کو ووٹ دیا۔

انہوں نے پیپلزپارٹی پر تنقید کرتے ہوئے کہا کہ عوام بخوبی جانتے ہیں کہ ترقیاتی کام کس نے کیے اور کس نے وقت ضائع کیا، اس لیے انتخابی نتائج کو تسلیم کرتے ہوئے آگے بڑھنا ہی جمہوری عمل کے مفاد میں ہے۔