امریکی تاریخ میں پہلی بار تمام 50 ریاستوں میں انتخابی نگران تعینات، محکمہ انصاف

امریکی محکمۂ انصاف نے ملک کی تاریخ میں پہلی بار تمام 50 ریاستوں میں تقریباً ایک ہزار انتخابی نگرانوں اور مبصرین کو تعینات کرنے کا فیصلہ کیا ہے، جن کا مقصد انتخابی عمل کی نگرانی اور وفاقی انتخابی قوانین پر عمل درآمد کا جائزہ لینا ہے۔

امریکی محکمۂ انصاف کے مطابق انتخابی نگرانوں کو مختلف ریاستوں میں تعینات کیا جا رہا ہے تاکہ اس بات کی جانچ کی جا سکے کہ ووٹنگ کے دوران وفاقی انتخابی قوانین کی پابندی کی جا رہی ہے یا نہیں۔ اس اقدام کا مقصد آزادانہ اور منصفانہ انتخابات کے انعقاد میں مدد فراہم کرنا ہے۔

محکمۂ انصاف کا کہنا ہے کہ ماضی کی امریکی حکومتیں بھی انتخابی عمل کی نگرانی کے لیے مبصرین تعینات کرتی رہی ہیں، تاہم بیک وقت تمام 50 ریاستوں میں اس بڑے پیمانے پر نگرانوں کی تعیناتی پہلے کبھی نہیں کی گئی۔

رپورٹ کے مطابق 2022 کے وسط مدتی انتخابات کے دوران سابق صدر جو بائیڈن کے دورِ حکومت میں محکمۂ انصاف نے صرف 24 امریکی ریاستوں میں انتخابی نگران تعینات کیے تھے۔

حالیہ اقدام کو امریکی انتخابی تاریخ میں نگرانی کے ایک غیر معمولی انتظام کے طور پر دیکھا جا رہا ہے، جس کے تحت ملک بھر میں انتخابی قوانین پر عمل درآمد کا جائزہ لیا جائے گا۔