پاکستانی حدود میں 8 ڈرونز داخل ہونے کی کوشش ناکام، تمام مار گرائے گئے

اسلام آباد: سکیورٹی ذرائع کے مطابق آج صبح افغان حدود سے آنے والے 8 ڈرونز نے پاکستانی فضائی حدود میں داخل ہونے کی کوشش کی، تاہم افواج پاکستان کے ایئر ڈیفنس سسٹم نے تمام ڈرونز کو مار گرایا۔

ذرائع کے مطابق 4 ڈرونز طورخم بارڈر سے ملحقہ علاقوں جبکہ دیگر 4 ڈرونز کوہاٹ سے متصل سرحدی پہاڑی علاقوں میں گرائے گئے۔

سکیورٹی ذرائع کا کہنا ہے کہ افواج پاکستان اور پاک فضائیہ نے عوامی مقامات کو نشانہ بنانے کی مبینہ کوشش کو ناکام بنایا۔

ذرائع کے مطابق یہ واقعہ افغان طالبان حکومت کی جانب سے دہشت گردوں کی مبینہ معاونت اور سرپرستی سے متعلق پاکستانی مؤقف کے تناظر میں سامنے آیا ہے۔

سکیورٹی ذرائع کے مطابق گزشتہ رات بھی کرم سیکٹر میں افغان طالبان کے متعدد مورچوں اور ٹھکانوں کو مبینہ اشتعال انگیز فائرنگ کے جواب میں نشانہ بنایا گیا۔

ذرائع کا کہنا ہے کہ افواج پاکستان ملک اور عوام کے دفاع کے لیے ہمہ وقت تیار ہیں۔