آیت اللہ علی خامنہ ای کی نماز جنازہ اور تدفین کا شیڈول جاری، آخری رسومات جولائی میں ہوں گی

(تہران) ایران نے رہبرِ اعلیٰ آیت اللہ علی خامنہ ای کی نمازِ جنازہ اور تدفین کے حوالے سے شیڈول جاری کر دیا ہے۔ ایرانی میڈیا رپورٹس کے مطابق آخری مذہبی تقریبات 4 اور 5 جولائی کو منعقد ہوں گی، جبکہ مختلف شہروں میں عوامی شرکت کے لیے خصوصی انتظامات کیے جا رہے ہیں۔

رپورٹس کے مطابق آیت اللہ علی خامنہ ای کے جسدِ خاکی کی الوداعی تقریبات امام خمینی مصلیٰ میں منعقد کی جائیں گی، جبکہ نمازِ جنازہ اور مرکزی جنازے کا جلوس 6 جولائی کو نکالا جائے گا۔

ایرانی ذرائع ابلاغ کے مطابق 7 جولائی کو مقدس شہر قم میں بھی ایک خصوصی جنازے کا جلوس منعقد کیا جائے گا، جبکہ تدفین کی تقریب 9 جولائی کو شمال مشرقی ایرانی شہر مشہد میں انجام پائے گی، جہاں انہیں روضہ امام رضا میں سپردِ خاک کیا جائے گا۔

رپورٹس میں مزید بتایا گیا ہے کہ انتظامیہ کی جانب سے ایران سمیت دنیا بھر کے مسلمانوں اور ایران سے محبت رکھنے والے افراد کو ان تقریبات میں شرکت کی دعوت دی گئی ہے۔

ایرانی میڈیا کے مطابق آیت اللہ علی خامنہ ای فروری میں ایران پر ہونے والے اسرائیلی اور امریکی حملوں کے دوران شہید ہوئے تھے، جبکہ ان کی وفات کے ساتھ ایران میں تین دہائیوں پر محیط قیادت کے ایک اہم دور کا اختتام ہوا ہے۔