آزاد جموں و کشمیر اسمبلی انتخابات تین مراحل میں کرانے کا فیصلہ، نیا انتخابی شیڈول جاری

(مظفر آباد )الیکشن کمیشن آزاد جموں و کشمیر نے قانون ساز اسمبلی کے انتخابات کا نیا شیڈول جاری کرتے ہوئے اعلان کیا ہے کہ انتخابات اب تین مختلف مراحل میں منعقد کیے جائیں گے تاکہ انتخابی عمل کو مزید منظم، شفاف اور پرامن بنایا جا سکے۔

چیف الیکشن کمشنر جسٹس (ر) غلام مصطفیٰ مغل کے مطابق پہلے مرحلے میں 27 جولائی کو میرپور ڈویژن میں پولنگ ہوگی، دوسرے مرحلے میں 2 اگست کو مظفرآباد ڈویژن اور پاکستان میں مقیم مہاجرین جموں و کشمیر کے 12 انتخابی حلقوں میں ووٹنگ کرائی جائے گی، جبکہ تیسرے مرحلے میں 10 اگست کو پونچھ ڈویژن میں انتخابات منعقد ہوں گے۔

الیکشن کمیشن کے مطابق میرپور ڈویژن میں 13 نشستوں، مظفرآباد ڈویژن اور مہاجرین کے مجموعی طور پر 21 نشستوں جبکہ پونچھ ڈویژن کی 11 نشستوں پر ووٹنگ ہوگی۔

چیف الیکشن کمشنر نے بتایا کہ ہر مرحلے کے انتخابات کے نتائج اسی روز شام تک جاری کر دیے جائیں گے تاکہ انتخابی عمل میں شفافیت اور بروقت نتائج کو یقینی بنایا جا سکے۔

انہوں نے واضح کیا کہ انتخابات ملتوی کرنے کے مطالبات مسترد کر دیے گئے ہیں اور تمام پولنگ شیڈول کے مطابق ہی ہوگی۔ الیکشن کمیشن نے انتظامی، سکیورٹی اور انتخابی امور کو مزید مؤثر بنانے کے لیے مرحلہ وار انتخابات کرانے کا فیصلہ کیا ہے۔

جسٹس (ر) غلام مصطفیٰ مغل کا کہنا تھا کہ مرحلہ وار پولنگ سے سکیورٹی اہلکاروں کی بہتر تعیناتی، انتخابی عملے کے مؤثر انتظام اور انتخابی عمل کی مؤثر نگرانی ممکن ہو سکے گی، جس سے آزاد، منصفانہ اور پرامن انتخابات کے انعقاد میں مدد ملے گی۔

الیکشن کمیشن نے تمام سیاسی جماعتوں، امیدواروں اور ووٹرز پر زور دیا ہے کہ وہ ضابطۂ اخلاق کی مکمل پابندی کریں، انتخابی مہم کو پرامن رکھیں اور جمہوری عمل کی کامیابی کے لیے الیکشن کمیشن سے بھرپور تعاون کریں۔

چیف الیکشن کمشنر نے مزید بتایا کہ انتخابات فوج کی نگرانی میں منعقد ہوں گے، جبکہ عالمی مبصرین اور ملکی و غیر ملکی صحافیوں کو انتخابی عمل کی کوریج کی مکمل اجازت دی جائے گی تاکہ شفافیت کو یقینی بنایا جا سکے۔