پاکستان اور جرمنی کے سفارتی تعلقات میں اہم پیش رفت، سفیر سلمان شریف کی جرمن صدر سے ملاقات

کراچی: جرمنی میں پاکستان کے سفیر سلمان شریف نے جرمن صدر فرینک والٹر شٹائن مائر کو اپنی سفارتی اسناد پیش کر دیں۔ اس موقع پر ہونے والی ملاقات میں دوطرفہ تعلقات کے فروغ، تجارت، سرمایہ کاری، توانائی اور ماحول دوست ٹیکنالوجی سمیت مختلف شعبوں میں تعاون بڑھانے کے عزم کا اظہار کیا گیا۔

سفیر سلمان شریف نے صدرِ پاکستان آصف علی زرداری، وزیراعظم اور پاکستانی عوام کی جانب سے جرمن صدر کو خیر سگالی کا پیغام پہنچایا۔

ملاقات کے دوران پاکستان اور جرمنی کے درمیان دیرینہ دوستانہ تعلقات کو مزید مضبوط بنانے اور مختلف شعبوں میں باہمی تعاون کے نئے مواقع تلاش کرنے پر زور دیا گیا۔ پاکستانی سفیر نے تجارت، سرمایہ کاری، توانائی اور گرین ٹیکنالوجی کے شعبوں میں تعاون بڑھانے کے عزم کا اعادہ کیا۔

جرمن صدر فرینک والٹر شٹائن مائر نے علاقائی امن کے لیے پاکستان کی کوششوں کو سراہتے ہوئے صدرِ پاکستان آصف علی زرداری کے اسی ہفتے ہونے والے دورۂ جرمنی کا خیرمقدم کیا۔

پاکستان اور جرمنی کے درمیان سفارتی تعلقات کے قیام کے 75 سال مکمل ہونے کے تناظر میں صدر آصف علی زرداری کا دورۂ جرمنی دونوں ممالک کے تعلقات میں ایک اہم سنگِ میل قرار دیا جا رہا ہے۔ اس دورے سے دوطرفہ تعاون، اقتصادی روابط اور مختلف شعبوں میں شراکت داری کو مزید فروغ ملنے کی توقع ہے۔