حکومت سے مذاکرات کی تیسری نشست کے لیے بیرسٹر گوہر متحرک

پشاور: پاکستان تحریک انصاف اور وفاقی حکومت کے درمیان مذاکرات میں ڈیڈلاک برقرار رہنے کے باوجود چیئرمین پی ٹی آئی بیرسٹر گوہر علی خان نے مذاکرات کی تیسری نشست کے لیے رابطے تیز کردیے ہیں۔

پی ٹی آئی اور وفاقی حکومت کے درمیان گزشتہ روز دو روزہ مذاکرات کا مرحلہ کسی حتمی نتیجے کے بغیر ختم ہوگیا تھا۔ تاہم پی ٹی آئی ذرائع کے مطابق بیرسٹر گوہر مذاکرات کا سلسلہ جاری رکھنے کے خواہاں ہیں اور تیسری نشست کے انعقاد کے لیے رابطے کر رہے ہیں۔

ذرائع کا کہنا ہے کہ پی ٹی آئی کے متعدد سینئر رہنما بھی لانگ مارچ سے قبل مذاکرات کے ذریعے کسی نتیجے پر پہنچنے کے خواہاں ہیں۔ پارٹی کے اندر مذاکراتی عمل کو آگے بڑھانے اور سیاسی معاملات کو بات چیت کے ذریعے حل کرنے کے حوالے سے مشاورت جاری ہے۔

دوسری جانب وفاقی وزیر داخلہ محسن نقوی نے سوشل میڈیا پر جاری بیان میں مذاکرات کے حوالے سے حکومت کا مؤقف پیش کیا ہے۔

محسن نقوی کے مطابق مذاکرات کے دوران خیبرپختونخوا حکومت نے 72 گھنٹوں کے اندر تحریری معاہدہ اور عملدرآمدی منصوبہ جمع کرانے پر اتفاق کیا تھا۔ ان کا کہنا تھا کہ مذاکرات میں کے پی حکومت تحریری معاہدے اور بہتر سکیورٹی پلان پر رضامند ہوگئی تھی، تاہم آخری مرحلے میں صوبائی حکومت نے اپنے وعدوں سے انکار کردیا۔

وزیر داخلہ نے کہا کہ خیبرپختونخوا اس وقت حالتِ جنگ میں ہے اور ایسے نازک وقت میں سکیورٹی کو سیاست کی بھینٹ نہیں چڑھانا چاہیے۔

حکومت اور پی ٹی آئی کے درمیان مذاکرات کے اگلے مرحلے کے حوالے سے تاحال کوئی حتمی تاریخ سامنے نہیں آئی، تاہم بیرسٹر گوہر کی جانب سے رابطوں کے بعد مذاکراتی عمل دوبارہ شروع ہونے کے امکانات زیرِ بحث ہیں۔