گلگت بلتستان میں تیروں کی بارش ہو رہی، بلاول بھٹو نے جیت پر جیالوں کو مبارکباد دے دی

چیئرمین پاکستان پیپلزپارٹی بلاول بھٹو نے گلگت بلتستان انتخابات میں پارٹی کی کامیابی پر کارکنوں اور حامیوں کو مبارکباد دیتے ہوئے کہا ہے کہ "گلگت بلتستان میں تیروں کی بارش ہو رہی ہے" اور پیپلزپارٹی واحد بڑی جماعت کے طور پر سامنے آ رہی ہے۔

سماجی رابطے کی ویب سائٹ پر اپنے پیغام میں بلاول بھٹو نے جیالوں کو شاندار انتخابی کارکردگی پر مبارکباد دی اور کہا کہ عوام نے پاکستان پیپلزپارٹی پر جس اعتماد کا اظہار کیا ہے، وہ اس پر ان کے شکر گزار ہیں۔

بلاول بھٹو کا کہنا تھا کہ ابتدائی نتائج اور موصول ہونے والی اطلاعات کے مطابق پاکستان پیپلزپارٹی گلگت بلتستان میں سب سے بڑی سیاسی جماعت بن کر ابھر رہی ہے۔ انہوں نے کہا کہ پارٹی عوامی مینڈیٹ کا احترام کرتے ہوئے حکومت سازی کے لیے کوشش کرے گی۔

چیئرمین پیپلزپارٹی نے مزید کہا کہ گلگت بلتستان کے عوام نے ترقی، جمہوریت اور عوامی خدمت کے ایجنڈے پر اعتماد کا اظہار کیا ہے، جس پر وہ ان کے بے حد مشکور ہیں۔

سیاسی مبصرین کے مطابق انتخابی نتائج کی تکمیل کے بعد حکومت سازی کے لیے مختلف سیاسی جماعتوں کے درمیان مشاورت اور ممکنہ اتحادوں کا عمل بھی اہم کردار ادا کر سکتا ہے۔