پاکستان نے سری لنکا کو شکست دے کر سہ ملکی سیریز جیت لی

لاہور: پاکستان نے سہ ملکی ون ڈے سیریز کے سنسنی خیز فائنل میں سری لنکا کو 3 وکٹوں سے شکست دے کر ٹائٹل اپنے نام کر لیا۔ قذافی اسٹیڈیم لاہور میں کھیلے گئے فائنل میں قومی ٹیم نے 326 رنز کا مشکل ہدف 49ویں اوور میں 7 وکٹوں کے نقصان پر حاصل کرلیا۔

فائنل میں پاکستان نے ٹاس جیت کر پہلے فیلڈنگ کا فیصلہ کیا، جس کے بعد سری لنکا نے مقررہ 50 اوورز میں 8 وکٹوں کے نقصان پر 325 رنز بنائے۔

سری لنکا کی جانب سے کمیندو مینڈس نے شاندار بیٹنگ کا مظاہرہ کرتے ہوئے 131 رنز کی اننگز کھیلی، جس میں 12 چوکے اور 2 چھکے شامل تھے۔ پون رتنائیکے نے 77 جبکہ اوشکا فرنانڈو نے 38 رنز اسکور کیے۔

پاکستان کی جانب سے سلمان علی آغا، شاہین شاہ آفریدی، حارث رؤف اور نسیم شاہ نے دو، دو وکٹیں حاصل کیں۔

326 رنز کے ہدف کے تعاقب میں پاکستان کی جانب سے فخر زمان نے شاندار سنچری اسکور کرتے ہوئے 127 رنز بنائے اور ٹیم کی کامیابی میں کلیدی کردار ادا کیا۔ سعد بیگ نے 74 جبکہ عرفات منہاس نے 61 رنز کی عمدہ اننگز کھیل کر ہدف کے حصول کو ممکن بنایا۔

حسن نواز 37 رنز بنا کر ناٹ آؤٹ رہے اور ٹیم کو فتح سے ہمکنار کیا۔

پاکستان نے سہ ملکی سیریز میں فائنل سمیت مجموعی طور پر 5 میچز کھیلے، جن میں سے 4 میں کامیابی حاصل کی جبکہ ایک میچ میں شکست کا سامنا کرنا پڑا۔

اس کامیابی کے ساتھ پاکستان نے پہلی مرتبہ اپنی سرزمین پر ایک بین الاقوامی ایونٹ کا ٹائٹل جیتنے کا اعزاز بھی حاصل کرلیا۔

واضح رہے کہ پاکستان نے آخری مرتبہ 2008 میں ون ڈے سہ فریقی سیریز کا ٹائٹل جیتا تھا، جب بنگلہ دیش میں کھیلے گئے فائنل میں بھارت کو شکست دی تھی۔