اپنی ہی جماعت کے دباؤ میں اضافہ، برطانوی وزیراعظم کیئر سٹارمر کے استعفے کی قیاس آرائیاں تیز

لندن: برطانیہ کی سیاست میں ایک نئی ہلچل اس وقت پیدا ہوگئی ہے جب اطلاعات سامنے آئی ہیں کہ وزیراعظم سر کیئر سٹارمر ممکنہ طور پر آج ہی اپنے عہدے سے علیحدگی یا اقتدار چھوڑنے کے منصوبے کا اعلان کر سکتے ہیں۔

سیاسی مبصرین کے مطابق برطانیہ گزشتہ چار برسوں میں تیسری مرتبہ ایسے مرحلے میں داخل ہوتا دکھائی دے رہا ہے جہاں ایک وزیراعظم عام انتخابات میں شکست کے بجائے اپنی ہی جماعت کے اندر بڑھتے ہوئے دباؤ کے باعث اقتدار چھوڑنے پر مجبور ہو سکتا ہے۔

حکومتی اور لیبر پارٹی کے ذرائع کا کہنا ہے کہ پارٹی کے متعدد بااثر رہنما سٹارمر کی حالیہ سیاسی کارکردگی سے مطمئن نہیں اور ان کا خیال ہے کہ وزیراعظم کی قیادت گزشتہ چند ماہ کے دوران پارٹی کے لیے مایوس کن ثابت ہوئی ہے۔

گزشتہ ہفتے میکرفیلڈ کے ضمنی انتخاب میں اینڈی برنہم کی نمایاں کامیابی کے بعد لیبر پارٹی کے اندر اختلافی آوازوں کو مزید تقویت ملی ہے۔ سیاسی حلقوں کا کہنا ہے کہ اس کامیابی نے پارٹی کے اندر قیادت کی تبدیلی کے مطالبات کو نئی قوت فراہم کی ہے۔

ذرائع کے مطابق وزیراعظم کیئر سٹارمر نے ہفتہ اور اتوار کا بیشتر وقت اپنی سیاسی حکمت عملی اور مستقبل کے ممکنہ آپشنز پر غور کرتے ہوئے گزارا۔ انہیں یہ احساس بھی ہے کہ موجودہ صورتحال میں ان کے لیے سیاسی راستے تیزی سے محدود ہوتے جا رہے ہیں۔

رپورٹس کے مطابق کابینہ کے کم از کم چار سینئر وزرا، جن میں وزیر داخلہ اور وزیر خارجہ بھی شامل ہیں، سٹارمر کو اقتدار سے علیحدگی کے لیے واضح ٹائم ٹیبل دینے کا مشورہ دے چکے ہیں۔

حکومتی حلقوں کا کہنا ہے کہ آج صورتحال مزید واضح ہونے کا امکان ہے اور وزیراعظم نہ صرف اپنے استعفے بلکہ اقتدار اپنے جانشین کے حوالے کرنے کے طریقہ کار سے متعلق بھی اہم اعلان کر سکتے ہیں۔

دوسری جانب لیبر پارٹی کی قیادت کے لیے اینڈی برنہم کا نام سب سے مضبوط امیدوار کے طور پر سامنے آ رہا ہے۔ اگرچہ پارٹی کے اندر باقاعدہ انتخابی عمل متوقع ہے، تاہم بعض سیاسی مبصرین اینڈی برنہم کی بلامقابلہ نامزدگی کے امکانات بھی ظاہر کر رہے ہیں۔

یاد رہے کہ اینڈی برنہم آج دوپہر ہاؤس آف کامنز میں رکنِ پارلیمنٹ کے طور پر حلف اٹھانے والے ہیں، جس کے باعث برطانوی سیاسی منظرنامے پر تمام نظریں آج ہونے والی پیش رفت پر مرکوز ہیں۔