لاہور کاہنہ حادثہ: ٹیوشن سینٹر کی چھت گرنے کا مقدمہ درج، 5 افراد گرفتار

(لاہور) کاہنہ کے علاقے میں ٹیوشن سینٹر کی چھت گرنے کے افسوسناک واقعے کا مقدمہ درج کر لیا گیا ہے، جس میں 14 بچوں کی ہلاکت کے بعد پولیس نے کارروائی کرتے ہوئے 5 افراد کو حراست میں لے لیا ہے۔

پولیس کے مطابق مقدمہ انفورسمنٹ انسپکٹر نشتر زون کاشف اسلم کی مدعیت میں درج کیا گیا ہے۔ ایف آئی آر کے متن میں کہا گیا ہے کہ ٹیوشن سینٹر کی چھت پر مرمتی کام کے دوران مبینہ غفلت اور لاپرواہی کے باعث زیادہ وزن پڑنے سے چھت گر گئی، جس کے نتیجے میں 14 بچے ملبے تلے دب کر جاں بحق ہو گئے جبکہ ایک خاتون ٹیچر سمیت 7 افراد زخمی ہوئے۔

ڈی آئی جی آپریشنز فیصل کامران کے مطابق واقعے کے بعد پولیس نے مکان مالک سمیت 5 افراد کو حراست میں لے لیا ہے۔ ان کا کہنا ہے کہ تفتیش مکمل ہونے کے بعد ذمہ داروں کے خلاف قانونی کارروائی عمل میں لائی جائے گی۔

ریسکیو حکام کے مطابق حادثے کی اطلاع شام 4 بج کر 45 منٹ پر ملی، جس کے بعد امدادی کارروائیاں فوری طور پر شروع کی گئیں۔ علاقہ مکینوں کے مطابق عمارت میں صبح کے اوقات میں اسکول بھی چلایا جاتا تھا جبکہ بچے ٹیوشن کے لیے موجود تھے۔

پولیس کے مطابق عمارت کی بالائی منزل پر تعمیراتی کام جاری تھا جبکہ گراؤنڈ فلور پر بچے موجود تھے، جس کے باعث یہ افسوسناک حادثہ پیش آیا۔

دوسری جانب وزیراعلیٰ پنجاب مریم نواز نے واقعے کا نوٹس لیتے ہوئے زخمیوں کو بہترین طبی سہولیات فراہم کرنے کی ہدایت کی ہے۔ انہوں نے فوری رپورٹ طلب کرتے ہوئے حادثے کے ذمہ داران کا تعین کرنے اور امدادی کارروائیوں کی نگرانی کے لیے صوبائی وزراء کو بھی ہدایات جاری کی ہیں۔