قانون نافذ کرنے والے اداروں کی بڑی کارروائی، بلوچستان سے خودکش بمبار خاتون گرفتار

(کوئٹہ) کوئٹہ میں پریس کانفرنس کرتے ہوئے سرفراز بگٹی نے کہا کہ خاتون کو اسلام آباد میں خودکش حملے کا ہدف دیا گیا تھا، تاہم بروقت کارروائی کے ذریعے دہشت گردی کی کوشش ناکام بنا دی گئی۔

انہوں نے بتایا کہ گرفتار خاتون نے دورانِ تفتیش انکشاف کیا کہ اس کا خودکش حملے کا منصوبہ تھا۔ وزیراعلیٰ بلوچستان کے مطابق دہشت گرد عناصر خواتین کو بلیک میل اور ذہنی دباؤ کے ذریعے استعمال کرتے ہیں۔

سرفراز بگٹی نے کہا کہ بچی کو دھمکی دی گئی تھی کہ اگر اس نے خودکش حملہ نہ کیا تو اس کے والد کو قتل کر دیا جائے گا۔ انہوں نے خواتین کو دہشت گردی کیلئے استعمال کرنے کے عمل کو انتہائی شرمناک قرار دیتے ہوئے کہا کہ دہشت گرد اپنے بیرونی آقاؤں کو خوش کرنے کیلئے معصوم بچیوں کو استعمال کرتے ہیں۔

گرفتار خاتون نے اپنے بیان میں کہا کہ اس کے کزن نے اسے دھمکیاں دیں اور کہا کہ بلوچ لبریشن آرمی کیلئے کام کرے ورنہ اس کے والد کو قتل کر دیا جائے گا۔ خاتون کے مطابق وہ تنظیم کیلئے موبائل کارڈز اور کھانے وغیرہ پہنچاتی رہی، بعد میں اسے معلوم ہوا کہ یہ سامان بی ایل اے کیلئے استعمال ہو رہا ہے۔

خاتون نے مزید بتایا کہ اسے خودکش حملے کیلئے ذہنی طور پر تیار کیا گیا تھا، تاہم پولیس نے حراست میں لینے کے بعد اس کے ساتھ باعزت رویہ اختیار کیا۔

حکام کے مطابق واقعے کی مزید تحقیقات جاری ہیں جبکہ دہشت گرد نیٹ ورک کے دیگر سہولت کاروں کی تلاش بھی کی جا رہی ہے۔