فٹ بال ورلڈ کپ: کانگو کی اُزبکستان کو 3-1 سے شکست، پرتگال اور کولمبیا کا میچ ڈرا

فٹ بال ورلڈ کپ کے گروپ K کے آخری مرحلے کے میچز میں کانگو نے شاندار کم بیک کرتے ہوئے اُزبکستان کو 3-1 سے شکست دے دی، جبکہ پرتگال اور کولمبیا کے درمیان کھیلا گیا مقابلہ بغیر کسی گول کے برابر رہا۔

میگا ایونٹ کے گروپ مرحلے کے آخری روز اُزبکستان نے میچ کا آغاز جارحانہ انداز میں کیا اور شومورودوف کے گول کی بدولت ابتدائی برتری حاصل کر لی۔

تاہم دوسرے ہاف میں کانگو نے شاندار کھیل کا مظاہرہ کرتے ہوئے مسلسل تین گول اسکور کیے۔ کانگو کی جانب سے ویسا نے دو جبکہ میلیے نے ایک گول کرکے ٹیم کو اہم فتح دلائی۔

اس کامیابی کے بعد کانگو نے ناک آؤٹ مرحلے میں جگہ بنا لی، جہاں راؤنڈ آف 32 میں اس کا مقابلہ انگلینڈ سے ہوگا۔

گروپ K کے دوسرے میچ میں پرتگال اور کولمبیا کے درمیان سنسنی خیز مقابلہ ہوا، تاہم دونوں ٹیمیں مقررہ وقت میں کوئی بھی گول کرنے میں ناکام رہیں اور میچ 0-0 سے برابر ختم ہوا۔

میچ میں پرتگال کے اسٹار فٹبالر کرسٹیانو رونالڈو بھرپور کوشش کے باوجود اپنی ٹیم کے لیے گول اسکور نہ کر سکے۔

گروپ مرحلے کے اختتام پر پرتگال نے پانچ پوائنٹس کے ساتھ دوسری پوزیشن حاصل کی، جس کے باعث ناک آؤٹ مرحلے میں اس کا مقابلہ کروشیا سے ہوگا، جبکہ کولمبیا کی ٹیم گھانا کے خلاف میدان میں اترے گی۔