ملک بھر میں ڈینگی سیزن شروع، اسلام آباد میں 7 ہزار سے زائد ڈینگی ہاٹ اسپاٹس کی نشاندہی

اسلام آباد میں ڈینگی کے بڑھتے خطرے کے باوجود شہر میں صفائی کے ناقص انتظامات شہریوں، خصوصاً بچوں اور خواتین کے لیے تشویش کا باعث بن رہے ہیں۔

پمز اسپتال کے سامنے ڈینگی لاروا کی موجودگی

پمز اسپتال میں زچہ و بچہ اور چلڈرن اسپتال کے سامنے کچرے کے ڈھیر ڈینگی مچھروں کی افزائش گاہ بن گئے ہیں۔ موقع پر موجود پرانے ٹائرز، ڈرمز اور پانی سے بھری بالٹیوں میں ڈینگی لاروا کی موجودگی سامنے آئی ہے۔

زچہ و بچہ اسپتال آنے والی خواتین اور بچوں کو ڈینگی کے ممکنہ خطرے کا سامنا ہے۔ ایم سی ایچ اسپتال کے سامنے موجود کچرے کے ڈھیر میں مختلف مقامات پر پانی جمع ہے، جہاں پرانے ٹائرز، ڈرمز اور بالٹیوں میں لاروا دیکھا جاسکتا ہے۔

اسپتالوں کے سامنے صفائی کے ناقص انتظامات

ایک جانب زچہ و بچہ اسپتال اور دوسری جانب چلڈرن اسپتال موجود ہیں، تاہم دونوں اسپتالوں کے عین سامنے صفائی کے ناقص انتظامات نے صورتحال کو مزید تشویشناک بنا دیا ہے۔

ڈینگی سیزن کے دوران مچھروں کی افزائش روکنے کے لیے پانی جمع ہونے والے مقامات کی صفائی، لاروا تلف کرنے اور ہاٹ اسپاٹس پر بروقت اسپرے سمیت مؤثر اقدامات ضروری ہیں۔

مقامی سطح پر صفائی کے انتظامات بہتر نہ ہونے کی صورت میں ڈینگی مچھر کی افزائش میں اضافے کا خدشہ موجود ہے۔ پمز انتظامیہ اور متعلقہ اداروں کی جانب سے فوری اور مؤثر صفائی و انسدادِ ڈینگی اقدامات کی ضرورت ہے۔

اسلام آباد میں 7 ہزار سے زائد ہاٹ اسپاٹس

ضلعی محکمہ صحت کے مطابق اسلام آباد میں 7 ہزار سے زائد ڈینگی ہاٹ اسپاٹس کی نشاندہی کی گئی ہے۔ بارشوں کے بعد جمع ہونے والا پانی ڈینگی مچھروں کی افزائش کے لیے موزوں ماحول فراہم کرتا ہے، اس لیے شہریوں اور متعلقہ اداروں کو احتیاطی اقدامات مزید تیز کرنے کی ضرورت ہے۔