ایران نے بھی امریکا کے ساتھ امن معاہدے کی تصدیق کر دی، اسلام آباد اکارڈ پر جمعہ کو دستخط ہوں گے

تہران: ایران نے بھی امریکا کے ساتھ طے پانے والے امن معاہدے پر باضابطہ اتفاق کی تصدیق کر دی ہے۔ نائب ایرانی وزیر خارجہ کاظم غریب آبادی نے کہا ہے کہ مفاہمتی یادداشت کے متن کو حتمی شکل دے دی گئی ہے اور اس کی باضابطہ منظوری بھی مکمل کر لی گئی ہے۔

کاظم غریب آبادی کے مطابق "اسلام آباد اکارڈ" پر باضابطہ دستخط جمعہ کے روز سوئٹزرلینڈ میں ہوں گے، جہاں معاہدے کے مختلف تکنیکی اور سفارتی پہلوؤں کو حتمی شکل دی جائے گی۔ انہوں نے واضح کیا کہ اگر معاہدے کی کسی بھی شق کی خلاف ورزی کی گئی تو ایران اپنے قومی مفادات کے تحفظ کے لیے خود مناسب اقدامات کرنے کا حق محفوظ رکھتا ہے۔

ایرانی نائب وزیر خارجہ کا یہ بیان ایک ایسے وقت میں سامنے آیا ہے جب امریکی صدر ڈونلڈ ٹرمپ بھی امریکا اور ایران کے درمیان امن معاہدہ مکمل ہونے کی تصدیق کر چکے ہیں۔ صدر ٹرمپ کے مطابق معاہدے کے تحت دونوں ممالک نے تمام محاذوں پر فوجی کارروائیوں کے فوری اور مستقل خاتمے پر اتفاق کیا ہے، جس میں لبنان بھی شامل ہے۔

امریکی صدر نے یہ بھی اعلان کیا تھا کہ آبنائے ہرمز کو عالمی تجارتی اور بحری سرگرمیوں کے لیے فوری طور پر کھول دیا جائے گا جبکہ امریکی بحری ناکہ بندی بھی ختم کر دی جائے گی، تاکہ عالمی تجارت اور تیل کی ترسیل معمول کے مطابق بحال ہو سکے۔

سفارتی ذرائع کے مطابق آئندہ چند روز میں ثالثی کے عمل میں شریک ممالک کے درمیان مزید مشاورتی اجلاس منعقد ہوں گے، جن میں معاہدے پر عمل درآمد، تکنیکی امور اور باضابطہ دستخطی تقریب کی تیاریوں کو حتمی شکل دی جائے گی۔ تجزیہ کار اس پیش رفت کو خطے میں کشیدگی کے خاتمے اور عالمی استحکام کی جانب ایک اہم سفارتی سنگِ میل قرار دے رہے ہیں۔