ایران پر مزید حملوں کی صورت میں 20 گنا زیادہ طاقت سے جواب دیں گے، صدر ٹرمپ کی سخت وارننگ

واشنگٹن: امریکی صدر ڈونلڈ ٹرمپ نے ایران کو سخت پیغام دیتے ہوئے کہا ہے کہ اگر ایران نے مزید حملے کیے تو امریکا ہر حملے کے جواب میں 20 گنا زیادہ طاقت سے کارروائی کرے گا۔

ایئر فورس ون میں صحافیوں سے گفتگو کرتے ہوئے صدر ٹرمپ کا کہنا تھا کہ امریکا ایران کے خلاف پہلے ہی نمایاں کامیابی حاصل کر چکا ہے۔ ان کے مطابق ایران کے پاس وقت بہت کم رہ گیا ہے اور وہ معاہدہ کرنا چاہتا ہے، تاہم انہیں اس بات پر یقین نہیں کہ ایران معاہدہ کرنے کے قابل ہے یا اس پر عمل درآمد کرے گا۔

ایک سوال کے جواب میں، جس میں ایران کی جانب سے تجارتی بحری جہازوں پر حملوں کا حوالہ دیا گیا، ٹرمپ نے کہا کہ ایران کا طرزِ عمل غیر معمولی اور کسی حد تک "قابو سے باہر" دکھائی دیتا ہے۔ انہوں نے کہا کہ ایران کچھ حد تک پاگل پن کا مظاہرہ کر رہا ہے، لیکن اس کے باوجود وہ معاہدہ کرنے کی خواہش رکھتا ہے۔

صدر ٹرمپ نے مزید کہا کہ امریکا نے ایران کو سخت نقصان پہنچایا ہے اور اگر مستقبل میں کسی بھی قسم کی جارحیت کا مظاہرہ کیا گیا تو اس کا بھرپور اور کئی گنا زیادہ طاقتور جواب دیا جائے گا۔

جب ان سے پوچھا گیا کہ کیا امریکا دوبارہ ایران کے ساتھ مکمل فوجی جنگ کی طرف بڑھ رہا ہے، تو انہوں نے کہا کہ اس بارے میں حتمی طور پر کچھ نہیں کہا جا سکتا، تاہم امریکا کے پاس کامیابی حاصل کرنے کے متعدد راستے موجود ہیں اور فوجی لحاظ سے امریکا پہلے ہی اپنے مقاصد حاصل کر چکا ہے۔

صدر ٹرمپ کے حالیہ بیان کو خطے میں جاری کشیدگی کے تناظر میں ایک اہم پیش رفت قرار دیا جا رہا ہے، جبکہ ایران کی جانب سے اس بیان پر تاحال کوئی باضابطہ ردعمل سامنے نہیں آیا۔