ڈاکٹر منصور میمن کو تمغۂ امتیاز سے نواز دیا گیا

ٹورنٹو: پاکستان کے لیے صحت، تعلیم، فلاحی خدمات اور ثقافتی سفارت کاری کے شعبوں میں نمایاں خدمات کے اعتراف میں ڈاکٹر منصور میمن کو تمغۂ امتیاز سے نواز دیا گیا۔ انہیں یہ اعزاز ٹورنٹو میں یومِ آزادی پاکستان کی تقریب کے دوران منعقدہ پرچم کشائی کی تقریب میں پیش کیا گیا۔

ڈاکٹر منصور میمن نے کینیڈا میں صحت کے شعبے میں اہم خدمات انجام دیں۔ انہوں نے کارڈیک ڈائیگناسٹکس سینٹر اور فیملی میڈیکل پریکٹس قائم کی، جبکہ 26 پاکستانی میڈیکل گریجویٹس کی کینیڈا میں ریزیڈنسی پروگرامز تک رسائی اور رہنمائی میں بھی کردار ادا کیا۔

پاکستان اور کینیڈا کے درمیان تعلقات کے فروغ کے لیے بھی ڈاکٹر منصور میمن سرگرم رہے اور کینیڈین پارلیمنٹیرینز، پالیسی سازوں اور پاکستانی کمیونٹی کے ساتھ رابطوں کے ذریعے دونوں ممالک کے درمیان تعاون کو فروغ دینے میں کردار ادا کیا۔

انسانی ہمدردی کے تحت پاکستانی قیدیوں کی رہائی کے لیے کی جانے والی کوششوں اور آپریشن بنیان المرصوص کے حوالے سے آگاہی پیدا کرنے میں بھی ان کی خدمات کو سراہا گیا۔

تمغۂ امتیاز کا اعلان صدرِ پاکستان کی جانب سے یومِ آزادی کے موقع پر کیا گیا تھا، جبکہ اعزاز دینے کی باقاعدہ تقریب کینیڈا میں پاکستانی سفارت کاروں، کینیڈین پارلیمنٹیرینز اور کمیونٹی رہنماؤں کی موجودگی میں منعقد ہوئی۔