مدینہ منورہ کے گرڈ اسٹیشن پر ڈرون حملہ، مسجد نبوی ﷺ کے امام کی شدید مذمت

ویب ڈیسک: مدینہ منورہ میں طیبہ بجلی تقسیم کار اسٹیشن پر ڈرون حملے کی سعودی عرب کی قیادت میں اتحادی افواج نے حوثی ملیشیا پر ذمہ داری عائد کی ہے، جبکہ مسجد نبوی ﷺ کے امام و خطیب شیخ صالح المغامسی نے واقعے کی شدید مذمت کی ہے۔

سعودی اتحادی افواج کے ترجمان میجر جنرل ترکی المالکی کے مطابق طیبہ بجلی تقسیم کار اسٹیشن کو 29 ستمبر کی صبح 5 بج کر 11 منٹ پر ڈرون سے نشانہ بنایا گیا۔ ان کے مطابق تحقیقات اور ڈرون کے ملبے کے تجزیے سے حملے کی منصوبہ بندی اور کارروائی میں حوثیوں کے ملوث ہونے کا تعین ہوا۔

ترجمان کے مطابق حملے کے نتیجے میں ایک ٹرانسفارمر سروس سے باہر ہوگیا، تاہم مدینہ منورہ کے مجموعی بجلی کے نظام پر کوئی اثر نہیں پڑا۔ طیبہ اسٹیشن ایک شہری تنصیب ہے جو مسجد نبوی ﷺ کو بھی بجلی فراہم کرتی ہے۔

مسجد نبوی ﷺ کے امام و خطیب شیخ صالح المغامسی نے واقعے کی مذمت کرتے ہوئے کہا کہ مدینہ منورہ رسول اللہ ﷺ کا شہر اور مسلمانوں کے لیے انتہائی مقدس مقام ہے، اسے نشانہ بنانا دنیا بھر کے مسلمانوں کے جذبات کو مجروح کرنے کے مترادف ہے۔

شیخ صالح المغامسی نے کہا کہ مکہ مکرمہ اور مدینہ منورہ کی حرمت تمام مسلمانوں کے دلوں میں ہے۔ انہوں نے مقدس مقامات کی حرمت اور سلامتی کے حوالے سے مسلمانوں کے متحد رہنے پر زور دیا۔

دوسری جانب متعدد ممالک اور تنظیموں کی جانب سے بھی واقعے کی مذمت کی گئی ہے۔ سعودی اتحادی افواج کے مطابق حرمین شریفین کے تحفظ اور زائرین کی سلامتی کے لیے اقدامات جاری رکھے جائیں گے۔

واضح رہے کہ حوثیوں کی جانب سے سعودی اتحادی افواج کے اس الزام پر فوری طور پر کوئی تبصرہ سامنے نہیں آیا تھا۔