9/11 انہی لوگوں نے کیا جن کو امریکا نے ہتھیار فراہم کیے تھے: اسماعیل بقائی

ایران کی وزارت خارجہ کے ترجمان اسماعیل بقائی نے کہا ہے کہ نائن الیون کے حملے انہی عناصر نے کیے جنہیں امریکا نے ماضی میں خود ہتھیار اور معاونت فراہم کی تھی۔

امریکی وزیر جنگ پیٹ ہیگسیتھ کے بیان پر ردعمل دیتے ہوئے اسماعیل بقائی نے کہا کہ امریکی وزیر جنگ کا مؤقف بنیادی تضادات سے بھرپور ہے۔ ان کا کہنا تھا کہ جارحیت اور بزدلانہ قتل کے مرتکب افراد کو دوسرے ممالک کے اقدامات کے جائز یا ناجائز ہونے پر سوال اٹھانے کا اختیار نہیں۔

ایرانی ترجمان نے دعویٰ کیا کہ جن عناصر کو امریکا نے مسلح اور منظم کیا، وہی نائن الیون کے واقعات کا سبب بنے۔ ان کے مطابق 11 ستمبر کے حملوں کے بعد دہشت گردی کے خلاف جنگ کے نام پر افغانستان اور عراق میں بڑے پیمانے پر تباہی ہوئی۔

اسماعیل بقائی نے ایران کے خلاف جنگ کو نائن الیون کے ساتھ جوڑنے کو انتہائی مضحکہ خیز قرار دیتے ہوئے امریکا پر ایرانی حکام، شہریوں، خواتین اور بچوں کو نشانہ بنانے کا الزام عائد کیا۔

انہوں نے واضح کیا کہ ایران کے خلاف جنگ غیر قانونی ہے اور اسے دہشت گردی کے خلاف جنگ قرار نہیں دیا جا سکتا۔ ان کا کہنا تھا کہ دہشت گردی کے خلاف کارروائی کا دعویٰ کسی بھی ملک کو عام شہریوں کو نشانہ بنانے کا جواز فراہم نہیں کرتا۔