ایران کا واضح مؤقف: آئندہ چند روز میں امریکا سے کسی بھی سطح پر مذاکرات طے نہیں

(تہران )ایران نے امریکا کے ساتھ ممکنہ مذاکرات سے متعلق گردش کرنے والی خبروں کی تردید کرتے ہوئے واضح کیا ہے کہ آئندہ چند روز میں کسی بھی سطح پر امریکا سے مذاکرات طے نہیں ہوئے۔

ایرانی وزارت خارجہ کے ترجمان اسماعیل بقائی نے اپنے بیان میں کہا کہ ایران کی مذاکراتی ٹیم دوحہ کا دورہ ضرور کرے گی، تاہم اس دورے کا مقصد امریکا کے ساتھ مذاکرات کرنا نہیں ہے۔

انہوں نے بتایا کہ دوحہ میں ایرانی وفد مفاہمتی یادداشت (ایم او یو) کی شقوں پر عمل درآمد، اس کی پیشرفت اور متعلقہ امور کا جائزہ لے گا۔ ان کے مطابق یہ دورہ پہلے سے طے شدہ تکنیکی اور سفارتی معاملات کے تناظر میں کیا جا رہا ہے۔

ترجمان ایرانی وزارت خارجہ نے مزید واضح کیا کہ قطر جانے والے امریکی نمائندوں کے دورے کا ایرانی وفد کے دورے سے کوئی تعلق نہیں اور دونوں وفود کے درمیان کسی ملاقات یا مذاکرات کا کوئی شیڈول موجود نہیں۔

اسماعیل بقائی کے مطابق ایران کی جانب سے امریکا کے ساتھ کسی بھی سطح پر فوری مذاکرات کے حوالے سے سامنے آنے والی اطلاعات درست نہیں ہیں، اور اس وقت ایسا کوئی سفارتی عمل طے نہیں پایا۔