فیصل واوڈا کا اسحاق ڈار کے استعفے کا مطالبہ، سنگین الزامات پر شفاف تحقیقات کا مطالبہ

اسلام آباد: سینیٹر فیصل واوڈا نے نائب وزیراعظم اور وزیر خارجہ اسحاق ڈار کے استعفے کا مطالبہ کرتے ہوئے حکومت پر ایک مبینہ مقدمے سے متعلق حقائق چھپانے کا الزام عائد کیا ہے۔

اپنی سوشل میڈیا پوسسٹ میں فیصل واوڈا نے کہا کہ پاکستان کو "فیملی کارپوریشن" کی طرح چلایا جا رہا ہے۔ انہوں نے دعویٰ کیا کہ اسحاق ڈار کے ایک مبینہ قریبی رشتہ دار پر غیر ملکی خواتین کو پاکستان بلا کر مبینہ زیادتی، تشدد اور بھتہ خوری کے الزامات سامنے آئے، جس کے بعد متعلقہ غیر ملکی سفارت خانے کی مبینہ مداخلت پر گرفتاری عمل میں آئی۔

فیصل واوڈا نے مزید الزام عائد کیا کہ حکومت اس مبینہ واقعے کو دبانے کی کوشش کر رہی ہے اور مقدمے کو مبینہ طور پر زیادتی کے بجائے بھتہ خوری تک محدود رکھنے کی کوشش کی جا رہی ہے۔ انہوں نے یہ بھی کہا کہ متاثرہ فریق کا ضابطہ فوجداری کی دفعہ 164 کے تحت بیان تاحال منظر عام پر نہیں آیا، جس پر سوالات اٹھ رہے ہیں۔

سینیٹر نے اپنے بیان میں کہا کہ ملک میں جمہوریت کے نام پر ایلیٹ طبقے کا قبضہ ہے اور انہوں نے افسوس کا اظہار کیا کہ اس معاملے پر حکومت، اپوزیشن یا اتحادی جماعتوں کی جانب سے کوئی واضح مذمتی بیان سامنے نہیں آیا۔