فخر زمان اور صائم ایوب آسٹریلیا ون ڈے سیریز سے باہر، انجریز کے باعث دستیاب نہیں

فخر زمان اور صائم ایوب انجریز کے باعث پاکستان اور آسٹریلیا کے درمیان ہونے والی ون ڈے سیریز کیلئے سلیکشن کے لیے دستیاب نہیں ہوں گے۔

پاکستان اور آسٹریلیا کے درمیان ون ڈے سیریز کا آغاز 30 مئی سے ہوگا، تاہم دونوں پاکستانی اوپنرز تاحال انجری سے مکمل طور پر صحت یاب نہیں ہو سکے۔

پاکستان کرکٹ بورڈ کے مطابق فخر زمان اور صائم ایوب اس وقت پی سی بی میڈیکل اسٹاف کی نگرانی میں ری ہیب کے عمل سے گزر رہے ہیں۔ بورڈ نے دونوں کھلاڑیوں کی جلد صحت یابی کیلئے نیک خواہشات کا اظہار بھی کیا ہے۔

پی سی بی کا کہنا ہے کہ قومی اسکواڈ اور دیگر کھلاڑیوں کی فٹنس سے متعلق مزید اپ ڈیٹس جلد جاری کی جائیں گی۔

دوسری جانب دونوں اوپنرز کی عدم دستیابی قومی ٹیم کیلئے بڑا دھچکا تصور کی جا رہی ہے، کیونکہ حالیہ عرصے میں فخر زمان اور صائم ایوب پاکستان کی بیٹنگ لائن کا اہم حصہ رہے ہیں۔