پاکستان کی فتح ٹو میزائل سسٹم کی کامیاب تربیتی مشق، دفاعی صلاحیت مزید مضبوط

راولپنڈی: پاک فوج کی آرمی راکٹ فورس کمانڈ نے مقامی طور پر تیار کردہ فتح ٹو میزائل سسٹم کی کامیاب تربیتی مشق مکمل کر لی ہے۔

پاک فوج کے شعبہ تعلقات عامہ کے مطابق فتح ٹو میزائل سسٹم جدید ترین ایویونکس اور نیوی گیشنل ٹیکنالوجی سے لیس ہے، جس کی کامیاب مشق سے پاکستان کی دفاعی صلاحیتوں میں مزید اضافہ ہوگا۔

آئی ایس پی آر کا کہنا ہے کہ مقامی طور پر تیار کردہ فتح ٹو میزائل کی جدید ایویونکس کے ساتھ تربیتی فائرنگ کی گئی، جس کے دوران میزائل کے مختلف سب سسٹمز کی کارکردگی اور تکنیکی پیرامیٹرز کی توثیق کی گئی۔

بیان کے مطابق تربیتی فائر کا بنیادی مقصد نظام کی درستگی، مؤثر کارکردگی اور آپریشنل صلاحیت کا جائزہ لینا تھا تاکہ مستقبل میں دفاعی تیاریوں کو مزید مضبوط بنایا جا سکے۔

اسٹریٹجک پلانز ڈویژن اور سینئر عسکری حکام نے مشق کا مشاہدہ کیا جبکہ فتح سیریز کی کامیاب تربیتی مشق پر فورم نے مکمل اطمینان کا اظہار کیا۔

اعلیٰ عسکری قیادت نے ٹیم کی تکنیکی مہارت، پیشہ ورانہ صلاحیت اور کاوشوں کو سراہتے ہوئے اس کامیابی کو ملکی دفاع کے لیے اہم پیش رفت قرار دیا۔