مولانا فضل الرحمان کو اپوزیشن اتحاد میں شامل کرنا چاہتے ہیں: بیرسٹر گوہر

پاکستان تحریک انصاف کے چیئرمین بیرسٹر گوہر خان نے کہا ہے کہ پی ٹی آئی کی خواہش ہے کہ جمعیت علمائے اسلام (ف) کے سربراہ مولانا فضل الرحمان اپوزیشن اتحاد کا حصہ بنیں۔

پارلیمانی پارٹی اجلاس کے بعد میڈیا سے گفتگو کرتے ہوئے بیرسٹر گوہر کا کہنا تھا کہ ہماری پہلے بھی خواہش تھی اور اب بھی خواہش ہے کہ مولانا فضل الرحمان ہمارے ساتھ اتحاد کا حصہ بنیں۔

انہوں نے کہا کہ تمام سیاسی جماعتوں کو ملک، پارلیمان، آزاد عدلیہ اور الیکشن کمیشن کی مضبوطی کے ایجنڈے پر متحد ہونا چاہیے۔

بیرسٹر گوہر نے واضح کیا کہ فی الحال جوائنٹ اپوزیشن کا اتحاد صرف قومی اسمبلی کے فلور اور قانون سازی کی حد تک ہے۔ ان کے مطابق سیاسی جماعتوں کے درمیان باہمی رابطہ اور گفتگو کا سلسلہ برقرار رہنا چاہیے۔

انہوں نے بتایا کہ پیپلز پارٹی کے رہنما بھی ملاقات کے لیے آئے تھے، جس سے سیاسی جماعتوں کے درمیان رابطوں کی اہمیت ظاہر ہوتی ہے۔

پی ٹی آئی چیئرمین کا کہنا تھا کہ بانی پی ٹی آئی عمران خان نے اپوزیشن تحریکوں اور سیاسی امور کا تمام اختیار اسد قیصر اور علامہ راجہ ناصر عباس کو دے رکھا ہے۔

بیرسٹر گوہر نے سیاسی کارکنان کو ہدایت کرتے ہوئے کہا کہ کسی کے خلاف نعرے بازی نہ کی جائے اور کارکنان گفتگو کے دوران شائستگی کا دامن برقرار رکھیں۔