بلوچستان کے مختلف علاقوں میں فورسز کی کارروائیاں، 9 دہشت گرد ہلاک

کوئٹہ: بلوچستان کے مختلف علاقوں میں سکیورٹی فورسز نے انٹیلی جنس بیسڈ آپریشنز کے دوران 9 دہشت گردوں کو ہلاک کرنے کا دعویٰ کیا ہے۔

سکیورٹی ذرائع کے مطابق آپریشن ردالفتنہ 3 کے تحت زیارت، ہرنائی اور سوراب میں دہشت گردوں کے خلاف کارروائیاں کی گئیں۔

ذرائع کے مطابق زیارت اور ہرنائی کے درمیان پہاڑی علاقے میں خفیہ اطلاع پر بڑے انٹیلی جنس بیسڈ آپریشن کے دوران دہشت گردوں کے ٹھکانے کو گھیرے میں لے کر مؤثر کارروائی کی گئی، جس کے نتیجے میں 8 دہشت گرد ہلاک ہوگئے۔

سکیورٹی فورسز نے کارروائی کے دوران دہشت گردوں کا ٹھکانہ بھی تباہ کردیا۔

دوسری کارروائی ضلع سوراب کے علاقے حاجیکہ گاؤں میں کی گئی، جہاں سکیورٹی فورسز نے دہشت گرد کی نقل و حرکت کا سراغ لگایا۔ دشت کٹائی اور حاجیکہ کے درمیان مؤثر ناکہ بندی کے بعد کارروائی میں ایک دہشت گرد ہلاک ہوا۔

سکیورٹی ذرائع کے مطابق کارروائیوں کے دوران ہلاک دہشت گردوں کے قبضے سے ایمونیشن، میگزین، دستی بم، واکی ٹاکی، موٹرسائیکل اور دیگر سامان بھی برآمد کیا گیا۔

سکیورٹی فورسز کے مطابق بلوچستان میں دہشت گردی کے مکمل خاتمے اور پائیدار امن کے قیام تک انٹیلی جنس بیسڈ کارروائیاں جاری رکھی جائیں گی۔