حکومت سے مذاکرات پر کوئی پیش رفت نہیں، فی الحال کسی سطح پر رابطہ نہیں ہوا: بیرسٹر گوہر

(اسلام آباد) پاکستان تحریک انصاف کے چیئرمین بیرسٹر گوہر علی خان نے کہا ہے کہ حکومت کے ساتھ مذاکرات کے حوالے سے فی الحال کسی بھی سطح پر کوئی رابطہ یا بات چیت نہیں ہو رہی، تاہم وزیراعظم کی جانب سے مذاکرات کی دعوت کا خیرمقدم کرتے ہیں۔

پارلیمنٹ ہاؤس میں میڈیا سے گفتگو کرتے ہوئے بیرسٹر گوہر نے کہا کہ مذاکرات ایک سنجیدہ عمل ہے جس کے لیے فریقین کو باقاعدہ طور پر بیٹھ کر بات کرنا ہوگی۔ انہوں نے واضح کیا کہ ابھی تک حکومت اور تحریک انصاف کے درمیان کسی فورم پر مذاکراتی عمل شروع نہیں ہوا۔

انہوں نے کہا کہ ملک کے وسیع تر مفاد میں تمام سیاسی قوتوں کو ذاتی انا سے بالاتر ہو کر فیصلے کرنا ہوں گے۔ ان کا کہنا تھا کہ یہ امید تھی کہ سیاسی قیادت کے درمیان روابط اور مصافحے سے ماحول بہتر ہوگا، اسی تناظر میں محمود خان اچکزئی نے بھی وزیراعظم سے ملاقات کرکے ہاتھ ملایا تھا۔

بیرسٹر گوہر نے کہا کہ مذاکرات تحریک انصاف کی خواہش ضرور ہیں، لیکن حقیقت یہ ہے کہ ابھی تک کسی قسم کا باضابطہ رابطہ نہیں ہوا۔ انہوں نے مزید کہا کہ جب تک لوگ بانی پی ٹی آئی کے ساتھ کھڑے ہیں، انہیں سیاسی طور پر مائنس نہیں کیا جا سکتا اور اس معاملے کا کوئی نہ کوئی حل نکالنا ہوگا۔

چیئرمین پی ٹی آئی نے سیاسی رہنماؤں کو جیلوں میں ڈالنے کی مخالفت کرتے ہوئے کہا کہ سیاست میں مقابلہ کارکردگی کی بنیاد پر ہونا چاہیے، نہ کہ مخالفین کو قید کرکے۔ انہوں نے مطالبہ کیا کہ بانی پی ٹی آئی کے اہل خانہ کو ان سے ملاقات کی اجازت دی جائے تاکہ وہ ان سے رابطہ کر سکیں۔

بیرسٹر گوہر کا کہنا تھا کہ سیاسی استحکام اور قومی مفاہمت کے لیے تمام فریقوں کو سنجیدگی کے ساتھ آگے بڑھنا ہوگا اور اختلافات کا حل مکالمے کے ذریعے تلاش کرنا چاہیے۔