حج 2027: رجسٹریشن کرانے والوں کی تعداد 3 لاکھ 81 ہزار سے بڑھ گئی، وزارت مذہبی امور کی نئی ہدایات

اسلام آباد: وزارت مذہبی امور نے اعلان کیا ہے کہ حج 2027 سے 2030 کے لیے رجسٹریشن کرانے والے افراد کی تعداد 3 لاکھ 81 ہزار سے تجاوز کر گئی ہے، جبکہ آئندہ مرحلے کی تیاری کے لیے عازمین کو ضروری ہدایات بھی جاری کر دی گئی ہیں۔

وزارت مذہبی امور کے ترجمان کے مطابق حج رجسٹریشن کے بعد اگلا مرحلہ جلد شروع ہونے والا ہے، اس لیے حج 2027 کی سعادت حاصل کرنے کے خواہشمند افراد اپنے پاسپورٹ کی مدتِ معیاد کا جائزہ لیں اور 16 نومبر 2027 تک کارآمد پاسپورٹ لازمی تیار رکھیں۔

ترجمان نے عوام کو خبردار کیا کہ حج سے متعلق سوشل میڈیا پر گردش کرنے والے جعلی اشتہارات اور گمراہ کن معلومات سے محتاط رہیں۔ انہوں نے کہا کہ ایسے اشتہارات کو نظر انداز کریں اور انہیں متعلقہ اداروں کو رپورٹ کریں تاکہ شہری کسی بھی قسم کے فراڈ سے محفوظ رہ سکیں۔

وزارت مذہبی امور نے مزید ہدایت کی کہ حج سے متعلق معلومات، رجسٹریشن اور دیگر سرکاری اعلانات کے لیے صرف وزارت مذہبی امور کی مستند ایپس اور سرکاری ذرائع پر ہی اعتماد کیا جائے اور غیر مصدقہ خبروں یا جھوٹے پراپیگنڈے سے گریز کیا جائے۔

وزارت کا کہنا ہے کہ حج کے تمام مراحل سے متعلق مزید معلومات اور ہدایات بروقت سرکاری ذرائع کے ذریعے جاری کی جائیں گی۔