مریم نواز کا چودھری سالک حسین کو ہتکِ عزت کا نوٹس بھجوانے کا اعلان

وزیر اعلیٰ پنجاب مریم نواز شریف نے وفاقی وزیر چودھری سالک حسین کو ہتکِ عزت کا قانونی نوٹس بھجوانے کا اعلان کرتے ہوئے کہا ہے کہ اگر ان کے پاس الزامات کے ثبوت موجود ہیں تو سامنے لائیں، بصورت دیگر عدالت میں جواب دینا ہوگا۔

ہونہار سکالرشپ اور طلبہ میں لیپ ٹاپ تقسیم کرنے کی تقریب سے خطاب کرتے ہوئے مریم نواز شریف نے کہا کہ چودھری سالک حسین وفاقی وزیر ہیں، انہیں الزامات لگانے کے بجائے ثبوت پیش کرنے چاہئیں۔ انہوں نے واضح کیا کہ وہ اس معاملے پر قانونی کارروائی کریں گی۔

وزیر اعلیٰ پنجاب نے گجرات میں بارش کے پانی سے متعلق صورتحال پر گفتگو کرتے ہوئے کہا کہ پرویز الہٰی نے جو گجرات شہر دیا، وہاں ان کی لیڈ کروزر بارش کے پانی میں ڈوب گئی۔ ان کا کہنا تھا کہ انہیں اس بات پر تکلیف ہے کہ انہوں نے گجرات کے ڈپٹی کمشنر کو تبدیل کیا، جس کے بعد بعض حلقے ان کے خلاف پروپیگنڈا کر رہے ہیں۔

مریم نواز شریف نے کہا کہ جو لوگ ان کے ناکام ہونے کے منتظر تھے، وہ آج پنجاب میں ترقیاتی کام دیکھ کر منفی پروپیگنڈا کر رہے ہیں۔

انہوں نے صفائی اور ذمہ داری کا درس دیتے ہوئے کہا کہ جس طرح اپنے گھر کو صاف رکھا جاتا ہے، اسی طرح ملک اور شہر کو بھی صاف رکھنا ضروری ہے۔ ان کا کہنا تھا کہ اختلافات اپنی جگہ، لیکن کسی کو ملک کے خلاف ہتھیار نہیں اٹھانے چاہئیں۔

وزیر اعلیٰ پنجاب نے مزید کہا کہ معاملہ کرپشن کا نہیں بلکہ الزامات اور ان کے ثبوت کا ہے۔ انہوں نے کہا کہ سفارش پر عہدے حاصل کرنے والے افراد ملک اور عوام کے لیے نقصان دہ ثابت ہوتے ہیں۔