حماس کا امریکا سے اسرائیل پر غزہ امن منصوبے پر عملدرآمد کیلئے دباؤ ڈالنے کا مطالبہ

غزہ: فلسطین کی مزاحمتی تنظیم حماس نے امریکا سے مطالبہ کیا ہے کہ وہ اسرائیل پر غزہ امن منصوبے پر عملدرآمد کے لیے دباؤ ڈالے۔

حماس رہنما باسم نعیم نے اپنے بیان میں کہا کہ امریکا غزہ امن معاہدے کا ضامن ہے، اس لیے اسے اسرائیلی حکومت پر معاہدے کے طے شدہ روڈ میپ پر عملدرآمد کے لیے دباؤ ڈالنا چاہیے۔

باسم نعیم کا کہنا تھا کہ سیاسی مفادات کی خاطر امن منصوبے پر عملدرآمد میں رکاوٹیں پیدا نہیں کی جانی چاہئیں۔ انہوں نے ثالث ممالک اور امریکا پر زور دیا کہ وہ اسرائیل پر امن روڈ میپ پر عملدرآمد کے لیے دباؤ بڑھائیں۔

حماس رہنما نے مزید کہا کہ امریکا کو اسرائیلی وزیراعظم بنیامین نیتن یاہو کی حکومت کو امن منصوبے کے اگلے مرحلے کو قبول کرنے پر آمادہ کرنا چاہیے۔

ان کا کہنا تھا کہ امن معاہدے کے ضامن اور ثالثوں کی ذمہ داری ہے کہ وہ فریقین کو طے شدہ شرائط پر عملدرآمد کی طرف لے کر جائیں۔

واضح رہے کہ حماس رہنما باسم نعیم کا یہ بیان اسرائیلی وزیراعظم بنیامین نیتن یاہو کی جانب سے غزہ امن منصوبے کو مسترد کیے جانے کے بعد سامنے آیا ہے۔

حماس اور اسرائیل کے درمیان جاری تنازع کے تناظر میں امن منصوبے کے اگلے مرحلے پر عملدرآمد ایک اہم معاملہ بن گیا ہے، جبکہ فریقین کے درمیان معاہدے کی شرائط پر اختلافات بدستور برقرار ہیں۔