اسلام آباد میں احتجاج روکنے کا حکومتی فیصلہ، رانا ثنا اللہ اور عطا تارڑ کے سخت بیانات

اسلام آباد: وزیراعظم کے مشیر برائے سیاسی امور رانا ثنا اللہ نے کہا ہے کہ حکومت نے اسلام آباد میں احتجاج کے معاملے کو مستقل طور پر ختم کرنے کا فیصلہ کیا ہے۔ ان کے مطابق پالیسی فیصلہ کیا گیا ہے کہ کسی کو احتجاج کے لیے اسلام آباد میں داخل ہونے کی اجازت نہیں دی جائے گی۔

رانا ثنا اللہ نے کہا کہ تحریک انصاف کو پیغام دیا گیا ہے کہ اگر طاقت کا استعمال کیا گیا تو 9 مئی کے بعد ملنے والی سہولتیں ختم کردی جائیں گی۔

دوسری جانب وفاقی وزیر اطلاعات و نشریات عطا اللہ تارڑ نے تحریک انصاف کی جانب سے اسلام آباد لانگ مارچ مؤخر کرنے کے فیصلے پر سخت ردعمل دیا۔ انہوں نے الزام عائد کیا کہ پی ٹی آئی کی سیاست میں احتجاج اور لانگ مارچ کے ذریعے دباؤ ڈالنا شامل ہے۔

عطا اللہ تارڑ نے تحریک انصاف کو لانگ مارچ کرنے کا چیلنج دیتے ہوئے خیبر پختونخوا حکومت پر افغان طالبان اور تحریک طالبان پاکستان کی مبینہ سہولت کاری کے الزامات بھی عائد کیے۔ انہوں نے وزیراعلیٰ خیبر پختونخوا سہیل آفریدی پر بھی تنقید کی۔

ادھر تحریک انصاف نے 27 ستمبر کو اسلام آباد کی جانب طے شدہ لانگ مارچ کو 4 اکتوبر تک مؤخر کرنے کا اعلان کیا ہے۔ وزیراعلیٰ خیبر پختونخوا سہیل آفریدی کے مطابق مارچ اب 4 اکتوبر کو پشاور سے شروع ہوگا۔