جڑواں شہروں میں موسلادھار بارش، متعدد آبادیاں زیرِ آب، راولپنڈی میں تعلیمی ادارے بند

اسلام آباد/راولپنڈی: جڑواں شہروں اسلام آباد اور راولپنڈی میں موسلادھار بارش نے نظامِ زندگی متاثر کر دیا، متعدد آبادیاں زیرِ آب آگئیں جبکہ پانی گھروں اور دکانوں میں داخل ہوگیا۔ شدید بارش کے باعث راولپنڈی کے سرکاری و نجی تعلیمی اداروں میں آج تعطیل کا اعلان کر دیا گیا ہے۔

محکمہ موسمیات کے مطابق بارش رات 3 بج کر 20 منٹ پر شروع ہوئی اور صبح 8 بجے تک جاری رہی۔ شدید بارش کے باعث مختلف سڑکوں اور علاقوں میں کئی کئی فٹ پانی جمع ہوگیا، جس سے شہریوں کو شدید مشکلات کا سامنا کرنا پڑا۔

پیرودھائی سے ملحقہ صفدرآباد، گلی لوہاراں اور فوجی کالونی سمیت مختلف علاقوں میں گھروں میں پانی داخل ہوگیا، جبکہ یونین کونسل 4 اور 5 کے علاقے بھی زیرِ آب آگئے۔ اعوان کالونی میں متعدد گاڑیاں پانی میں ڈوب گئیں جبکہ راولپنڈی کا ماڈل راجہ بازار بھی بارش کے پانی سے متاثر ہوا۔

بارش کے بعد نالہ لئی میں پانی کی سطح مسلسل بلند ہو رہی ہے۔ کٹاریاں کے مقام پر پانی کی سطح 27 فٹ جبکہ گوالمنڈی کے مقام پر پانی کا بہاؤ 21 فٹ ریکارڈ کیا گیا۔ صورتحال کے پیشِ نظر قریبی آبادیوں کے رہائشیوں کو انخلا کا الرٹ جاری کر دیا گیا ہے۔

شدید بارش کے باعث ایکسپریس وے پر بھی بدترین ٹریفک جام ہوگیا اور گاڑیوں کی طویل قطاریں لگ گئیں۔

واسا حکام کے مطابق شمس آباد میں سب سے زیادہ 197 ملی میٹر بارش ریکارڈ کی گئی، جبکہ گولڑہ میں 157، نیو کٹاریاں میں 184، پی ایم ڈی میں 146 اور پیرودھائی میں 86 ملی میٹر بارش ہوئی۔

دوسری جانب ڈپٹی کمشنر کے مطابق بارش کی صورتحال کے باعث راولپنڈی کے تمام سرکاری و نجی تعلیمی ادارے آج بند رہیں گے۔

ادھر نیشنل ڈیزاسٹر مینجمنٹ اتھارٹی (این ڈی ایم اے) نے آئندہ 48 گھنٹوں کے دوران ملک کے بالائی اور وسطی علاقوں میں مزید بارشوں کی پیشگوئی کی ہے۔ گلگت بلتستان، خیبرپختونخوا، آزاد کشمیر اور پنجاب کے مختلف علاقوں میں بارش کا امکان ہے۔

این ڈی ایم اے کے مطابق بالائی علاقوں میں بارشوں کے باعث دریاؤں میں پانی کے بہاؤ میں اضافے جبکہ ندی نالوں میں طغیانی کا خدشہ ہے۔