بائنانس پر 6.3 ارب ڈالر کا سائبر حملہ، ہیکرز نے کرپٹو اثاثے چوری کر لیے

لندن:دنیا کی سب سے بڑی کرپٹو کرنسی ایکسچینج بائنانس (Binance) کو تاریخ کے بڑے سائبر سکیورٹی حملوں میں سے ایک کا سامنا کرنا پڑا ہے، جس کے نتیجے میں تقریباً 6.3 ارب ڈالر مالیت کے کرپٹو اثاثے متاثر ہوئے۔ واقعے کے بعد کمپنی نے سکیورٹی اقدامات کے تحت ڈپازٹس اور رقم نکلوانے کا عمل عارضی طور پر معطل کر دیا۔

غیر ملکی میڈیا رپورٹس اور بلاک چین تجزیاتی اداروں کے مطابق ہیکرز نے بائنانس کے انٹرنیٹ سے منسلک ہاٹ والٹس کو نشانہ بنایا اور متعدد بلاک چین نیٹ ورکس کے ذریعے اربوں ڈالر مالیت کے ڈیجیٹل اثاثے منتقل کیے۔ ابتدائی تجزیوں کے مطابق بڑی تعداد میں یہ لین دین انتہائی مختصر وقت میں انجام دیا گیا۔

بائنانس نے 30 اکتوبر کو جاری کردہ اپنے ابتدائی سکیورٹی بیان میں تقریباً 6.3 ارب ڈالر کے نقصان یا متاثرہ اثاثوں کا تخمینہ ظاہر کیا ہے۔ کمپنی کے مطابق ابتدائی تحقیقات میں ایک ڈیو آپس (DevOps) انجینئر کے لیپ ٹاپ تک غیر مجاز رسائی کا امکان سامنے آیا، جس کے ذریعے حملہ آور ایک سروس کنٹینر تک پہنچا اور غیر مجاز ٹرانزیکشنز انجام دینے میں کامیاب ہوا۔ تاہم کمپنی کو اب تک والٹ کی نجی چابیاں لیک ہونے کا کوئی ثبوت نہیں ملا۔

بلاک چین تجزیاتی اداروں کے مطابق چوری شدہ اثاثوں کی مالیت تقریباً 5.91 ارب ڈالر سے 6.36 ارب ڈالر تک بتائی گئی ہے۔ اس واقعے کو فروری 2025 میں بائی بٹ (Bybit) ایکسچینج سے ہونے والی تقریباً 1.5 ارب ڈالر کی کرپٹو چوری سے بھی بڑا قرار دیا جا رہا ہے۔

ہیکنگ کی خبر سامنے آنے کے بعد کرپٹو انڈسٹری میں ہنگامی صورتحال پیدا ہوگئی۔ اسٹیبل کوائن جاری کرنے والی کمپنیوں ٹیدر (Tether) اور سرکل (Circle) نے فوری کارروائی کرتے ہوئے حملہ آوروں سے منسلک اثاثوں کو منجمد کرنا شروع کر دیا۔

رپورٹس کے مطابق ٹیدر نے تقریباً 1.57 ارب ڈالر مالیت کے اثاثے منجمد کیے، جبکہ سرکل نے 80 کروڑ ڈالر سے زائد کے اثاثوں کو منجمد کیا۔ اس کے علاوہ دیگر بلاک چین شراکت داروں کے تعاون سے بھی رقوم کی منتقلی روکنے کے اقدامات کیے گئے۔ بائنانس کے مطابق اب تک تقریباً 3 ارب ڈالر کے متاثرہ کرپٹو اثاثے بلاک چین پر منجمد کیے جا چکے ہیں۔

دوسری جانب بائنانس کے بانی چانگ پینگ ژاؤ اور شریک بانی یی ہی نے سوشل میڈیا پلیٹ فارم ایکس پر صارفین کو یقین دہانی کرائی کہ صارفین کے فنڈز محفوظ ہیں اور ہیکنگ کے باعث ہونے والے نقصانات کی ادائیگی کمپنی اپنے محفوظ اثاثوں کے فنڈ (SAFU) اور کمپنی کے اپنے وسائل سے کرے گی۔

بائنانس نے اپنے بیان میں کہا ہے کہ واقعے کی تحقیقات جاری ہیں اور قانون نافذ کرنے والے اداروں سمیت بلاک چین انٹیلی جنس کمپنیوں کے ساتھ مل کر چوری شدہ اثاثوں کا سراغ لگانے اور انہیں واپس حاصل کرنے کی کوششیں کی جا رہی ہیں۔

ادھر بلاک چین تجزیاتی ادارے ٹی آر ایم لیبز نے اپنی تحقیقات میں اس حملے کا شبہ شمالی کوریا کے ہیکنگ گروپ ٹریڈر ٹریٹر (TraderTraitor) پر ظاہر کیا ہے۔ تاہم حملہ آوروں کی شناخت سے متعلق تحقیقات جاری ہیں۔

سائبر حملے کی خبر کے بعد عالمی کرپٹو مارکیٹ میں بھی مندی دیکھی گئی۔ بٹ کوائن کی قیمت 79 ہزار ڈالر سے نیچے آگئی، جبکہ دیگر بڑی کرپٹو کرنسیوں کی قیمتوں میں بھی کمی ریکارڈ کی گئی۔

یہ واقعہ ڈیجیٹل اثاثوں کی سکیورٹی اور عالمی کرپٹو ایکسچینجز کے حفاظتی نظام کے حوالے سے نئے سوالات کو جنم دے رہا ہے۔