ہاکی ورلڈ کپ 2026: پاکستان قومی ٹیم اور آفیشلز کا اعلان، ابوبکر محمود کپتان مقرر

(لاہور )پاکستان ہاکی فیڈریشن نے 15 سے 30 اگست تک نیدرلینڈز اور بیلجیئم میں ہونے والے ہاکی ورلڈ کپ 2026 کیلئے قومی ٹیم اور آفیشلز کا باضابطہ اعلان کر دیا ہے۔ قومی ٹیم کی قیادت ابوبکر محمود کریں گے، جبکہ فیڈریشن نے اعلان کردہ اسکواڈ پر مکمل اعتماد کا اظہار کیا ہے۔

اعلان کردہ اسکواڈ میں کپتان ابوبکر محمود کے علاوہ وقار، عبداللہ، سفیان خان، معین شکیل، عبدالوحید، اشرف رانا، عبدالحنان شاہد، زکریا حیات، ارشد لیاقت، عدیل لطیف، احمد ندیم، غضنفر علی، عماد شکیل بٹ، حماد الدین انجم، رحمان عبدال، افراز، عمر مصطفیٰ، علی رضا، عبدالمتان اور محمد عماد شامل ہیں۔

قومی ٹیم میں دو گول کیپرز، وقار اور علی رضا، کو بھی شامل کیا گیا ہے تاکہ ٹورنامنٹ کے دوران دفاعی لائن کو مزید مضبوط بنایا جا سکے۔

آفیشلز میں اویس قرنی ٹیم منیجر، باب جوہان ویلڈہوف ہیڈ کوچ اور کرسٹوفر جان بوون اسسٹنٹ کوچ کی ذمہ داریاں انجام دیں گے۔

پاکستان ہاکی فیڈریشن کے صدر محی الدین احمد وانی نے اعلان کردہ اسکواڈ پر مکمل اعتماد کا اظہار کرتے ہوئے امید ظاہر کی کہ قومی ٹیم عالمی ایونٹ میں بہترین کارکردگی کا مظاہرہ کرے گی۔

واضح رہے کہ ہاکی ورلڈ کپ 2026 کا انعقاد 15 سے 30 اگست تک نیدرلینڈز اور بیلجیئم میں مشترکہ طور پر ہوگا، جہاں دنیا کی صفِ اول کی ٹیمیں عالمی اعزاز کے لیے مدمقابل ہوں گی۔