190 ملین پاؤنڈ کیس: عمران خان کی بینائی متاثر، قید تنہائی پر اسلام آباد ہائیکورٹ میں اہم سماعت

(اسلام آباد) 190 ملین پاؤنڈ کیس میں بانی پی ٹی آئی عمران خان اور بشریٰ بی بی کی اپیلوں اور سزا معطلی درخواستوں پر سماعت کے دوران وکیل نے قیدِ تنہائی اور صحت سے متعلق سنگین خدشات عدالت کے سامنے رکھ دیے۔

اسلام آباد ہائیکورٹ میں چیف جسٹس سرفراز ڈوگر اور جسٹس محمد آصف پر مشتمل بینچ نے کیس کی سماعت کی۔

بانی پی ٹی آئی کے وکیل سلمان صفدر نے عدالت کو بتایا کہ 8 اپریل کو عدالتی حکم پر ان کی عمران خان سے ملاقات ہوئی، تاہم بشریٰ بی بی سے ملاقات نہیں کرائی گئی جو عدالتی احکامات کے خلاف تھا۔ ان کے مطابق بشریٰ بی بی سے آخری ملاقات 20 دسمبر 2025 کو ہوئی تھی۔

وکیل نے بتایا کہ ملاقات کے دوران عمران خان نے اپنی صحت سے متعلق تشویشناک صورتحال بیان کی۔ ان کے مطابق عمران خان کی 85 فیصد بینائی متاثر ہو چکی ہے اور ایک آنکھ سے دیکھنے میں بھی دشواری ہے، جبکہ ڈاکٹروں نے بہتری کے امکانات کم ظاہر کیے ہیں۔

سلمان صفدر نے کہا کہ عمران خان کو 22 گھنٹے جبکہ بشریٰ بی بی کو 24 گھنٹے قیدِ تنہائی میں رکھا جا رہا ہے، جو انسانی حقوق کے منافی ہے۔ انہوں نے سوال اٹھایا کہ عدالتی فیصلے میں قیدِ تنہائی کی سزا شامل نہیں، پھر جیل حکام ایسا کیوں کر رہے ہیں۔

انہوں نے عدالت سے استدعا کی کہ آئی جی جیل خانہ جات، جیل سپرنٹنڈنٹ اور متعلقہ ڈاکٹروں کو طلب کر کے صورتحال واضح کی جائے۔ انہوں نے نیلسن منڈیلا رولز کا حوالہ دیتے ہوئے کہا کہ طویل عرصے تک قیدِ تنہائی کو تشدد تصور کیا جاتا ہے۔

دوسری جانب چیف جسٹس سرفراز ڈوگر نے استفسار کیا کہ اپیلوں پر دلائل کیوں نہیں دیے جا رہے۔ انہوں نے ریمارکس دیے کہ عدالت اپیل سننے کیلئے تیار ہے اور روزانہ کی بنیاد پر سماعت کر کے جلد فیصلہ کر سکتی ہے۔

عدالت نے مزید سماعت ملتوی کرتے ہوئے فریقین کو آئندہ کارروائی کیلئے تیار رہنے کی ہدایت کر دی۔