عمران خان کی ہمشیرہ نورین نیازی کی طبیعت ناساز، کوٹ لکھپت جیل سے پنجاب کارڈیالوجی منتقل

لاہور: بانی پاکستان تحریک انصاف (پی ٹی آئی) عمران خان کی ہمشیرہ نورین نیازی کی طبیعت خراب ہونے پر انہیں کوٹ لکھپت جیل سے اسپتال منتقل کر دیا گیا۔

نورین نیازی کے وکیل رانا مدثر عمر نے سوشل میڈیا پر جاری اپنے بیان میں بتایا کہ جیل میں طبیعت ناساز ہونے کے بعد نورین نیازی کو پنجاب انسٹی ٹیوٹ آف کارڈیالوجی منتقل کیا گیا ہے۔

وکیل نے نورین نیازی کی جلد صحت یابی کے لیے دعاؤں کی اپیل کرتے ہوئے کہا کہ ان کی عمر 70 سال ہے اور وہ غیر قانونی طور پر زیرِ حراست ہیں۔

رانا مدثر عمر کے مطابق نورین نیازی کی اسپتال منتقلی کے حوالے سے ان کے خاندان کے کسی فرد کو اطلاع نہیں دی گئی، جس پر انہوں نے تشویش کا اظہار کیا۔

واضح رہے کہ نورین نیازی کی طبیعت خراب ہونے اور اسپتال منتقلی سے متعلق تفصیلات ان کے وکیل کے سوشل میڈیا بیان کی بنیاد پر سامنے آئی ہیں۔ ان کی موجودہ طبی حالت اور اسپتال میں علاج سے متعلق مزید تفصیلات تاحال فراہم نہیں کی گئیں۔