بھارت ایک سال بعد بھی معرکہ حق میں شکست تسلیم کرنے سے انکاری ہے: آئی ایس پی آر

راولپنڈی: پاک فوج کے شعبہ تعلقات عامہ (آئی ایس پی آر) نے کہا ہے کہ معرکہ حق کو ایک سال سے زائد عرصہ گزرنے کے باوجود بھارت تلخ حقیقت کا سامنا کرنے اور اپنی شکست تسلیم کرنے سے انکاری ہے۔ آئی ایس پی آر کے مطابق بھارت آپریشن سندور کے نام پر تاریخ کو اپنے من پسند انداز میں دوبارہ لکھنے کی کوشش کر رہا ہے۔

آئی ایس پی آر نے بھارتی آپریشن سندور پر بنائی گئی ڈاکیومنٹری پر ردعمل دیتے ہوئے کہا کہ بھارت شکست تسلیم کرنے کے بجائے اسے من پسند رنگ دینے میں مصروف ہے۔ بھارتی ڈاکیومنٹری حقائق کے بجائے جذباتی بیانیے اور فلمی انداز کی عکاس ہے، جس کے ذریعے جنگی حقائق کو مسخ کرنے کی کوشش کی گئی۔

پاک فوج کے شعبہ تعلقات عامہ کے مطابق پہلگام حملے کے مبینہ ملزمان اگر 28 جولائی کو مارے گئے تو سوال یہ ہے کہ 7 مئی کو بھارت نے کس کو سزا دی؟ آئی ایس پی آر نے کہا کہ آپریشن سندور کو پہلگام حملے کا بدلہ قرار دینے کا بھارتی دعویٰ اس کے اپنے بیانیے سے متصادم ہے۔

آئی ایس پی آر کے مطابق بھارت کا آپریشن سندور میں 100 فیصد مشن کامیابی کا دعویٰ بھی آپریشنل ریکارڈ سے مطابقت نہیں رکھتا۔

پاک فوج کے شعبہ تعلقات عامہ نے کہا کہ معرکہ حق کے دوران پاکستان نے بھارتی جارحیت کو ناکام بنایا اور پاکستان نے 8 بھارتی فوجی طیارے مار گرائے۔ آپریشن ’’بنیان مرصوص‘‘ میں 26 بھارتی فوجی اہداف کو نشانہ بنایا گیا۔

آئی ایس پی آر کا کہنا ہے کہ فلمی مناظر، دعوے اور ڈاکیومنٹریز طیاروں کے نقصانات اور حقیقی جنگی حقائق کو تبدیل نہیں کر سکتے۔

بیان میں کہا گیا کہ پاکستان کو معرکہ حق کے حوالے سے کوئی من گھڑت بیانیہ بنانے کی ضرورت نہیں، جنگی ریکارڈ، سفارتی رابطے اور خود بھارتی بیانات حقیقت بیان کرتے ہیں۔

آئی ایس پی آر کے مطابق پاکستان علاقائی امن و استحکام کے لیے پرعزم ہے، جبکہ پاکستانی مسلح افواج ملکی خودمختاری اور سالمیت کے دفاع کے لیے مکمل طور پر تیار ہیں۔

پاک فوج کے شعبہ تعلقات عامہ نے خبردار کیا کہ اگر مستقبل میں کوئی مہم جوئی کی گئی تو پاکستان کی جانب سے جواب فیصلہ کن ہوگا۔