بھارتی فضائیہ کا ایک اور طیارہ حادثے کا شکار، آسام میں اے این-32 میں لینڈنگ کے بعد آگ بھڑک اٹھی

نئی دہلی: بھارتی فضائیہ کا ایک اور طیارہ حادثے کا شکار ہو گیا، جس کے بعد بھارتی عسکری فضائی بیڑے میں پیش آنے والے مسلسل حادثات نے ایک بار پھر توجہ حاصل کر لی ہے۔

بھارتی جریدے انڈیا ٹوڈے کے مطابق ریاست آسام کے ضلع جورہاٹ میں بھارتی فضائیہ کا اے این-32 طیارہ حادثے کا شکار ہوا، جہاں ابتدائی اطلاعات کے مطابق لینڈنگ کے فوراً بعد طیارے میں آگ بھڑک اٹھی۔ واقعے کے بعد امدادی ٹیمیں فوری طور پر موقع پر پہنچ گئیں اور صورتحال پر قابو پانے کی کارروائیاں شروع کر دی گئیں۔

رپورٹ کے مطابق بھارتی فضائیہ نے بھی اے این-32 طیارے کو پیش آنے والے حادثے کی تصدیق کر دی ہے، تاہم حکام کی جانب سے حادثے کی وجوہات یا ممکنہ جانی نقصان کے حوالے سے تفصیلات فوری طور پر جاری نہیں کی گئیں۔

دستیاب اطلاعات کے مطابق رواں سال کے دوران بھارتی فضائیہ کو متعدد فضائی حادثات کا سامنا کرنا پڑا ہے، جن میں مختلف نوعیت کے طیارے اور ایک ہیلی کاپٹر شامل ہیں۔ ان واقعات نے بھارتی فضائی بیڑے کی آپریشنل تیاریوں اور تکنیکی نظام کے حوالے سے کئی سوالات کو جنم دیا ہے۔

دفاعی امور پر نظر رکھنے والے مبصرین کا کہنا ہے کہ پے در پے فضائی حادثات اس بات کی نشاندہی کرتے ہیں کہ بھارتی فضائیہ کو تکنیکی دیکھ بھال، تربیت اور آپریشنل استعداد کے میدان میں درپیش چیلنجز سے نمٹنے کے لیے مزید مؤثر اقدامات کی ضرورت ہے۔ ان کے مطابق حالیہ حادثات کی شفاف تحقیقات اور حفاظتی معیار کو بہتر بنانا مستقبل میں ایسے واقعات کی روک تھام کے لیے اہم ہوگا۔