ایران کی عسکری صلاحیت برقرار، نصف سے زائد میزائل لانچرز اور ہزاروں ڈرون اب بھی موجود: امریکی انٹیلی جنس

(واشنگٹن ڈی سی ) امریکی انٹیلی جنس کی ایک تازہ رپورٹ میں انکشاف کیا گیا ہے کہ ایران کے پاس اب بھی اپنی عسکری طاقت کا ایک بڑا حصہ محفوظ ہے، جس میں 50 فیصد سے زائد میزائل لانچرز اور ہزاروں ڈرون شامل ہیں۔

رپورٹ کے مطابق ایران کی میزائل اور ڈرون صلاحیت خطے میں اب بھی ایک بڑی قوت کے طور پر موجود ہے اور وہ کسی بھی وقت وسیع پیمانے پر کارروائی کی صلاحیت رکھتا ہے۔ امریکی انٹیلی جنس ذرائع کا کہنا ہے کہ ایران نہ صرف اپنی دفاعی پوزیشن برقرار رکھے ہوئے ہے بلکہ پورے خطے میں اثر انداز ہونے کی بھرپور صلاحیت بھی رکھتا ہے۔

امریکی نشریاتی ادارے سی این این کے مطابق ایران کے پاس اب بھی نمایاں تعداد میں میزائل لانچرز موجود ہیں، جبکہ اس کے ہتھیاروں میں شامل ہزاروں ڈرونز بھی فعال حالت میں ہیں۔ مزید برآں، ایران نے ساحلی دفاع کے لیے کروز میزائلوں کا ایک بڑا ذخیرہ بھی برقرار رکھا ہوا ہے۔

رپورٹ میں خبردار کیا گیا ہے کہ ایران کے ساحلی علاقوں میں تعینات کروز میزائل آبنائے ہرمز میں جہاز رانی کے لیے خطرہ بن سکتے ہیں، جو عالمی تجارت کے لیے ایک نہایت اہم گزرگاہ ہے۔

ماہرین کے مطابق ایران کی یہ عسکری صلاحیت خطے میں کشیدگی کو برقرار رکھ سکتی ہے اور بین الاقوامی برادری کے لیے ایک اہم چیلنج بنی ہوئی ہے